Pag-antos pagsunod kang Kristo

“Ang mag-antos ma Santos ang dili mag-antos mamutos.”

Ang maong panultihon nag-puntil sa kinatibuk-ang kasinatian natong mga tawo. Tuod man, kita tanan nakasinati ug kalisud sa atong kinabuhi. Mga pagsulay nga magtukmod kanato sa dili pagpuyo sa maayo nga kinabuhi ug sa pagpapas sa birtud nga atong gipuy-an isip usa ka Katoliko. Ug dinhi mahisabtan nato kung unsa ang pag-antos sa atong kinabuhi. Gikinahanglan kini aron nga makab-ot nato atong mga tinguha ug gusto sa kinabuhi. Kinahanglan nato magkat-on ug pag-sakripisyo o pag-antos kay kundili, kita dali lamang matarog ug madala sa mga problema ug mga kalisud nga masinati nato sa atong kinabuhi nga maoy magtukmod nato sa pagputol sa paglihok ug pag-uswag sa atong tagsa-tagsa nga pagpuyo.

Ang maong punto, maingon nako nga tinuod jud sa akong kasinatian isip usa ka seminarista. Kung wala ko magkat-on ug pag-antos siguro dugay nako niundang ug nigawas sa seminaryo. Kay diha sa akong kasinatian, daghan jud ang nisulay kanako diha palang sa sitwasyon nga nahilayo ko sa akong mga ginikanan, lisod kaayo ug mingaw. Apan diha-diha, ang pag-antos ug pag-sakripisyo dako kaayong natabang kung unsa man akong naabot karun. Mi-gradwar na ako semenaryo tungod nagkat-on ako ug pag-antos kay kabalo ko nga kining tanan adunay mahimung bunga sa kinalasan.

Dungag pa sa akong pagpamalandong niini, ang pag-antos dili lang man kutob sa atong kasinatian isip tawo. Apan baliklantawon nato ang kinabuhi sa atong Ginoong Hesus nga usab misinati ug pag-antos niadtong ni-a pa siya nakigkuyog nato. Atong Ginoo nag-antos sa mga pagtamay-tamay sa mga tao ug usab nag-antos diha sa pagparal niya diha sa krus aron lamang maluwas kita sa kaulip-nan sa sala. Siya nahibalo nga sa iyang pag-antos sa kasamtangan diha sa pagpalansang sa krus, magpugas kini ug binhi nga mutubo ug mamunga, nga mao atong kaluwasan sa sala.

Mao kana, hagit sa matag usa kanato nga magkat-on ug pag-antos o pag-sakripisyo kay nahibalo kita sa atong kapanahunan karun di kita gusto mag-sakripisyo. Gusto nato tanan nga hayahay nga “instant”! Mahinumdum unta kita nga ang pag-antos ug pag-sakripisyo kabahin jud sa atong kinabuhi. Ug kon dili kita mahibulong sa pagkat-on niini kita di magmalampuson sa atong mga tinguha ug gusto, kay kita dali man lamang makabig nga muundang ug diha-diha “mamutos.” (Sem. John Carlo Mibulos | Matanao)