Unang Santacruzan sa Talicud

Nagpahigayon og Santacruzan ang isla sa Talicud ubos sa pagtugot sa Kura Paroko Fr. Rico Enriquez. Kini atol sa pagtapos sa Flores de Mayo sa GKK Sta. Cruz, sentro sa tanang GKK sa isla.

Ang prusisyon giapilan sa 7 ka GKKs. Matag GKK nagdala sa simbolo sa mga Reyna. Ang nahimong Reyna Elena ug ang Emperador Constantino puros miyembro sa Sta. Cruz, Reyna Justicia (Dapia) GKK San Jose, Reyna delos Angeles (BayBay) GKK-San Antonio de Padua, Reyna delas Estrellas (Baong 2) GKK-Inahan sa Kanunay’ng Panabang, Reyna del Santisimo Rosario (Cebuley) GKK-San Vicente Ferrer, Reyna Candelaria (Upper Sta. Cruz) GK- Sto. Nino, Reyna delos Flores (Maniksik) GKK-Kasilak.

Kining maong selebrasyon usa lamang sa mga gihimong dagkong selebrasyon sa Isla nga gipangandaman sa mga lumulopyo. Kini tungod usab nga hapit nang mamahimong hingpit nga Parokya ang Sta. Cruz. Duna na kini luna nga kabutangan.

Gitapos ang maong celebrasyon sa usa ka misa kauban si Fr. Oliver Maningo, usa ka missionary nga pari nga bag-ong naordinahan gikan Talicud Island.

Gipamatuod sa mga parokyano nga buhi kining maong Krus sama sa ilang pagtuo kang Kristo nga buhi ug Hari, ang agianan, ang kamatuoran ug ang kinabuhi. Nagmalampuson ang pagsaulog pinaagi sa sakripisyo sa mga katekista Olga Robles ug Juan Mohammad, sa mga Pangulo sa Alagad Temotea Montuya ug sa mga Pangulo sa Liturhiya Rogelio Ponce, ug Coordinator sa Talicud Area Lynn Sipalayan. (Joferson Tacsan)