Padayong pag-inambitay sa pagbangon

MATICITY –  Nahitabo ang pag-inambitay ug pagtinabangay alang sa mapadayunong pagbangon sa mga lungsod nga nagun-oban sa miaging Supertyphoon Pablo.

Niadtong Mayo 30, mga 23 nga dagkong carton kon balikbayan boxes sa mga libro ug school supplies nga gidonar sa Association of Filipino Chinese of Vancouver, British Columbia, sa nasud Canada, ang gihatud sa trak sa Diyosesis sa Mati ngadto sa mga tulonghaan sa Cateel, Boston, Kinablangan, ug Lambajon.

Ang naasoyng donasyon ang gipasilitar sa mga alumni sa Immaculate Heart of Mary Academy (IHMA) sa Mati pinaagi sa coordinasyon ni Sr. Justina Villagracia, MIC, kanhi principal sa tulunghaan, nga nagpuyo sa Our Lady of Good Counsel convent sa dakbayan sa Davao.

Sa samang bahin, gihatud usab ang upat ka mga susamang dagkong carton sa mga libro ug school supplies nga gidonar sa mga taga Davao City pinaagi sa mga paningkamut ni Fr. Edilberto “Loloy” Mahinay, pangulo sa Pre-Theology Year (PTY) sa St. Francis Xavier Seminary sa Catalunan Grande, Davao City, kini alang sa Maryknoll Academy of Cateel, kansang principal mao si Fr. Jay Ramos, ug kanhi usab si Fr. Loloy.

Sa maong mga manggihatagong tanyag alang sa buhat sa edukasyon, mapasalamaton si Obispo Patricio H. Alo sa kamanggihatagon sa mga midonar nga gikan sa Canada ug sa dakbayan sa Davao.

Sa laing bahin, ning kapin lima na ka bulan na karon sukad sa paghapak ni bagyong Pablo, sa labing ulahing katikaran gikan sa CBCP-Nassa-Caritas site sa Boston, Davao Oriental, nasayran gikan ni Project Officer Cesaria Hugue nga niorganisa ang mga kabatan-onan sa CBCP-Nassa youth sa debriefing ug feeding program sulod sa kalihokan nga nag-apodapod og Basic Survival Kits (BSK) sa Barangay Sibajay alang sa mga benepisyaryo sa Caritas shelter.  Matud pa, nahimo kini usa ka halandumong kasinatian dili lamang sa mga kabataan kondili usab sa ubang mga sakop sa pamilya, labi na diha sa pag-awit sa mga kanta nga gikomponer mismo sa mga bata.

Ang feeding program giandam nila Sis Maria Bitoy, Emelou Oribia, ug mga kaubang volunteers gikan sa parokya sa San Ignacio, Manay, Davao Oriental para sa mga 100 ka mga bata, kinsa usab gihatagag mga tsinelas.

Samtang gituman usab ang debriefing, BSK distribution ug feeding program sa Brgy Carmen ug poblacion sa Boston, ug sa lima ka mga barangay sa Cateel—San Antonio, San Alfonso, Aragon, Sta. Filomena, ug Poblacion.

Gipahigayon usab ang general assembly sa pipila ka mga sitio nga natukuran nag mga balay alang sa mga benepisyaryo pinaagi sa CBCP-Nassa Caritas Shelter project; gani sa Sitio Baguidanan gipili si San Pedro Calungsod isip ilahang patron sa bag-ong kapilya.

Gikan sa Manila, personal nga mitambong usab si NASSA National Executive Secretary Fr. Edwin Gariguez sa pipila ka mga kalihokan isip on site visit niya sa Baganga, Cateel, Boston, ug Lingig, Surigao del Sur, kon diin iyang gipahayag nga ang ilahang pagtabang sa mga GKK ug Day Care Centers maoy importanteng legasiya sa CBCP-Nassa-Caritas Pilipinas alang sa mga pamilya nga ilang gipaambitan og hinabang.