Pinaagi sa Espirito Santo nagapadayon ang pagbag-o sa Simbahan

Usa sa gimando sa Second Plenary Council of the Philippines (PCP II) niadto pang 1991, mao ang pagwagtang sa sistema sa “arancel” sa Simbahan diri sa Pilipinas, ug hinayhinay nga pulihan sa “tithing” (PCP II, Art.118).

Kining maong mando, nagpadayag sa pagtan-aw sa Simbahan nga ang maong daang sistema nakadaot sa imahen sa Simbahan. Apan, hangtud karon, 24 na ka tuig ang milabay, wala pa kini natagaan og katumanan sa daghang mga diyosesis.

Ang sistema sa “arancel” mao ang dugay na kaayong paagi sa Simbahan diin nagapangayo siya og insaktong kantidad sa matag okasyon sa iyang pagpangalagad, sama sa pagbendita, pagsaulog sa mga sakramento, pagpakompisal ug ubp. Gitawag usab kini nga “stole fees.” Tungod niini, nagahuna-huna hinoon ang mga tawo nga “bayad” kini alang sa mga sagradong serbisyo sa Simbahan.

Sa tinuod, matud sa balaod sa Simbahan, ang mga magtutuo mahimo nga mohatag og halad sa okasyon sa pagsaulog sa mga Sakramento ug sakramental. Sa makadaghan naghimo og talaan sa mga “halad” aron sa paggiya sa katawhan. Apan, gidili ang paghikaw sa mga Sakramento ug sakramental kanila bisan og dili makahatag og halad tungod sa kalisod ug kawad-on. Obligasyon sa Simbahan sa pag-alagad bisan walay halad.

Ang naandang “arancel” nahimong usa sa mga paagi sa mga magtutuo nga motabang suporta sa Simbahan. Pinaagi niini, ang Simbahan makatigom og pundo alang sa iyang mga buluhaton ug obligasyon. Busa, kon dako ang parokya, pananglitan, mas dako ang iyang matigom gikan niini ug dakong tabang sa pagtubag sa galastohanan sa parokya.

Duna nay mga diyosesis nga nagsugod sa paghimo sa lain-laing klaseng “tithing” apan gipadayon pa gihapon nila ang “arancel” hangtud karon. Tingali, nakita nga dili pa igo ang “tithing” aron pagsuporta sa parokya. Ang lain pa, daghan ang wala moapil sa pag “tithing.”

Apan usa ka arsidiyosesis didto sa probinsiya sa Pangasinan, nangahas nga magsugod na. Human sa tulo ka tuig nga katekesis bahin sa “stewardship,” gisugdan na pagpahiluna sa mga bagong pamaagi. Usa niini mao ang pagdili na sa pagsingil og insaktong halad sa okasyon sa pagdawat sa mga Sakramento ug pagpahigayon sa mga “sakramental.”

Ang arsobispo sa Arsidiyosesis sa Lingayen-Dagupan, Arsobispo Socrates Villegas nagpakanaog og polisiya nga ang mga opisina sa parokya dili na mo-obligar ni mosugyot sa mga parokyano nga mohatag og insaktong donasyon alang sa mga serbisyo sa Simbahan. Giwala na nila ang talaan sa mga “halad.”

Sa Sulat Pastoral ni Arsobispo Villegas, iyang gipahinumduman ang tanan nga obligasyon sa mga Pari nga moalagad bisan walay halad.

Sa laing bahin, ilhon ug bation usab sa matag anak sa Simbahan nga kaakuhan niya ang manggihatagon ug madasigon nga supportahan ang atong Inahan ug Magtutudlo sa pagtoo. Matud pa ni Arsobispo Villegas, ang paghatag sa Simbahan unta himoon nga kinasingkasing nga balansayon sa tanang mga anak sa Simbahan, bisan og walay pagasaulog sa mga Sakramento.

Sa inanay nga pagwagtang sa “arancel” gitinguha nga mabugto ang higot tali sa mga Sakramento ug sa mga halad. Sa ingon ang mga Sakramento ug sakramental dili na maisip nga mga serbisyo nga binayran sa mga halad. Ug labaw sa tanan, ang sagradong pagpangalagad, ginamit ang Stola sa Pari, dili na mahugawan sa marka sa salapi.

Gipuli nila sa “arancel,” ang “pananabangan” (Stewardship). Tumong kuno sa “pananabangan” mao ang pag-umol sa tanang mga magtutuo nga magmapasalamaton sa gitugyan sa Dios kanila nga mga gasa sa kinabuhi, sa pagtoo, sa Simbahan, sa pamilya. Isip tinugyanan lamang, makanunayon, mapaubsanon ug malipayon siyang nagapasalamat. Dili kini bahin sa salapi lamang, kon dili apil ang pagpaambit sa panahon ug talento alang sa uban.

Niining ika-40 nga tuig sa ALAY KAPWA, nindot ug kusog kaayo nga pagsaksi nga gihimo pinaagi sa “Pananabangan.” Mahimo unta kini nga sumbanan ug mahagit unta ang ubang diyosesis sa pagsunod niini. Dili gayud imposibli nga pag-abot sa 2021, sa dakong Hubileyo sa atong pagka-katoliko sa Pilipinas, mahatagan na gayud kini ug saktong pagtagad ug katumanan sa tanan.

Niining Tuig sa mga Kabus, mapasalamaton kita sa mga gasa sa spirito Santo kinsa atong gisaulog karong Dominggo sa Pentekostes. Siya ang nagadasig ug naggahum kanato nga bag-ohon ang atong mga pamaagi aron mahiuyon sa Maayong Balita sa kaluwasan.

“Ginoo, ipadala ang imong spirito, ug bag-oha ang nawong sa yuta.”