Cebuano Journalism Seminar, Ilusad sa Diocese of Digos

SAMTANG ang mga lideres giumol pinaagi sa Summer Pastoral Institute, abli ang Diocese of Digos sa pagpahiluna usab sa iyang social communications apostolate aron mas mapakaylap pa ang maayong balita labi na sa mga kabus.

Nahimugso ang SUGID (Supplement of the Diocese of Digos) human sa Media Baby ka ba? Journalism Writeshop nga gipahigayon sa Davao Catholic Herald sa niaging bulan.

Isip practicum, ang 29 ka mga migraduate gikan sa Malita, Padada, Sta. Cruz, Malita, Digos, Matanao, Sulop, ug Hagonoy gipasuwat ug balita. Kini aron makit-an ang ilang kahanas sa pag interbyu, pagkuha ug hulagway, ug paghimo ug balita.

Human makagula ang 4 ka isyu, ang Training ug Editorial teams mubalik na usab sa Digos aron ipahigayon ang evaluation ug Cebuano Journalism Writeshop.

“Maayo man nga magtuon ta sa English, apan tungod kay aduna man tay magbabasa nga mga yanong tao, importante nga makato-on ta ug suwat ug balita sa atong pinulongan aron mas sayon ang pagpasabot. Human sa lecture, aduna nay writeshop ug field work. Tun-an pud namo sila ug photojournalism,“ matud pa sa DC Herald Associate Editor Dr. Cheryl Vilog.

Nanghinaut ang team nga mamalik ang tanan sa round 2 karong Mayo 22, 1-5 sa hapon, sa Bishop’s residence, Digos City.