Pag-umol sa Lideres, Gipakusgan

Diocese of Digos Summer Pastoral Institute

ANG diocese sa Digos nagapahigayon og tinuig nga pormasyon nga ginatambungan sa mga lideres sa matag parokya. Sa sugod pa gitawag kini ug Summer Catechetical Institute. Ang mga partisipante niini mao ang core group sa mga katekista kada parokya.

Apan sugod niadtong tuig 2012, giabli ang partisipasyon ngadto sa tanang apostolado nga nagahatag og pormasyon sama sa Family and Life Apostolate (FLA), Bible Apostolate (BA), Youth, ug uban pang teaching apostolates. Gitawag kini sila ug Parish Teaching committee (PARTECOM).

Karong tuiga mas nakita ang dakong panginahanglan sa pagpakaylap sa mensahe sa Ebanghelyo, ilabina sa mga kabus sa material, espiritwal ug moral. Ang tinuig nga Summer Catechetical Institute gitawag na ug Summer Pastoral Institute niining Tuig sa mga Kabus. Mas nilapad pa ang partisipasyon sa maong pormasyon. Ang tulo ka ministriya diha sa parokya miapil napud sama sa apostolado sa pagpanudlo, pag-ampo ug pangalagad.

Ang 1st batch nagsugod April 14-16, ang 2nd, April 21-24, ug ang 3rd, April 28-30, 2015. Ang matag parokya mipadala ug siyam (9) ka partisipante: 3 gikan sa PARTECOM, 3 sa Parish Committee on Liturgy (PARCOL), ug 3 gikan sa Parish Social Action Ministry (PSAM).

Ang mga staff sa Diocesan Catechetical Formation Center (DCFC), Diocesan Liturgical Center (DLC), ug Diocesan Social Action Ministry (DSAC) ang mipahigayon sa maong pormasyon gamit ang module sa “Year of the Poor.” Aduna usab integration sa catechesis alang sa 51st international Eucharistic Congress. (Willybeth Salutillo | DCFC Staff)