Human trafficking: susihon, mohukom, molihok

Mahinumduman pa ba nato kadtong batang babaye, si Glyzelle Palomar nga nangutana kang Papa Francisco nganong gitugutan sa Dios nga dunay mga bata, sama niya, nga mabiktima ug masakit sa kamot sa mga mapahimuslanong mga tawo? Usa si Glyzelle sa milyon-milyon ka mga bata sa kalibutan nga biktima sa “human trafficking.” Didto kadto sa University of Santo Tomas diin gihinagbo ni Papa Francisco ang mga bata ug batan-on. Nahinumdum gayud ako nga nakahilak ako niadtong tungura ug si Papa Francisco pud. Ingon siya niadtong tungura nga dunay mga panguntana nga walay ikatubag gawas ang pagluha sa kasakit ug kasubo ug paghupay sa balatian.

Nasayod ako, nga daghan sa mga nakasaksi niadtong eksena, didto mismo sa UST ug sa milyon-milyon nga mga Pilipino nga nanan-aw sa TV, natandog usab ug nakahilak pa gani. Nasayod man gud kita nga tinuod kining pang-abuso ug pagdagmal sa dignidad sa mga bata, nga nagakahitabo gayod kini sa daghang mga pamilya ug katilingban sa tibuok kapupud-an. Na ordinaryo naman kini nga kasinatian. Nahimong normal. Ug gidawat na lamang nga kabahin sa panaw sa kinabuhi karon niining walog sa luha.

Gikan sa mga dapit nga gipuy-an, ang mga babaye ug mga bata dad-on sa laing dapit aron didto panamastamasan, hukasan og dignidad, hadlokon, ug kasagaran himoong ulipon alang sa katagbawang sexual sa mga lalake. Ibalik-balik silang ibaligya samtang mapuslan pa sa mga lalake. Kung dili na mapuslan, buhian o patyon na lamang. Libo-libo ka mga bata ug babaye ang nagakabiktima niining kaalaot matag adlaw. Kung hain ana ang pornograpiya, ang mga lugar sa kahilayan, makaseguro kita nga dunay mga biktima diha sa “human trafficking.”

Naa nay balaod batok niini RA 9280, apan nagpadayon kining maong kalamidad sa atong mga katilingban ug kalungsuran. Daghan pa kaayong mga tawo nga wala masayod ug wala nakasabot pag-ayo sa dakong kadaot niini sa pamilya ug sosyodad. Mismo ang kaggamhanan wala kaayo gipatuman ang balaod. Daghang mga lungsuranon wala lamang nagpakabana.

Dako man gud kaayo ni nga negosyo sa tibuok kalibutan. Sa ato pa, pangwarta lamang kini, gikabuhian sa uban apan gikamatay sa mas daghan. Matod pa sa impormasyon, ikatulo kini nga pinaka dako nga industriya sunod sa illegal nga droga nga maoy una, ug ang pagbaligya’g armas nga maoy ika-duha. Dinagkong sindikato na kuno ang naa sa luyo niini.

Atubangan sa kahimtang nga nagbunga og daghang mga biktima sama ni Glyzelle, mahimo ba nga ato na lang ning dawaton, piyongan, bungol-bungolan? Ato na lang ba ilingi ang atong nawong ngadto sa pikas aron dili kita maistorbo? Dili na lamang ba kita mangilabot niini? Si Jesus, nga kalooy ug duyogkasakit, dili gayod mosugot niini. Molihok gayud kita pinaagi sa pagtoo. “Ang guma ni Kristo nag-aghat kanato…” (2 Kor. 5:14). Ang pagtoo nga walay buhat, patay matod pa ni Santiago Apostol. (Santiago 2:17)

Ang una gayod nga buhaton mao ang pagpakisayod bahin sa “human trafficking” diha mismo sa imong katilingban. Kinahanglan mosunod ang pagsabot sa mga hinungdan, sa kahimtang sa mga nagpaluyo ug nagtulod sa mga nabiktima ug namiktima diha sa “human trafficking.” Mosunod ang matoohong pamalandong ug pagampo sa maong kahimtang. Sa katapusan, aron magmapuslanon ug mapadayag ang buhing pagtoo, katilingbanong molihok sa pagtubag sa kahimtang aron pagluwas niini.