Panawduaw ni San Jose nga Mamumuo sa St. James Bekaryato

Ang parokya ni San Jose nga Mamumuo sa Sasa, Davao City, nagpahigayon og Pilgrimage ngadto sa St. James Parish, Bunawan; St. John the Baptist Parish, Lasang; St. Francis Xavier Parish, Tibungco; San Miguel Parish, Panacan; St. Francis of Assisi, Laverna ug balik sa parokya.

Kini gihimo isip usa sa mga pangandam alang sa umaabot nga kapistahan karong Mayo 1, ug sa tinguha nga magdani og mga devotees gikan sa lain-laing parokya nga maningkamot sa pagpuyo sa mga birtudes nga naangkon sa Amahan sa Sagrada Pamilya, aron pagdapit nga motambong sa Novena sa kapistahan nga pagasugdan sa Abril 22, sa alas 4:30 pm, sa St. Joseph the Worker Parish ug aron makab-ot ang tinguha nga mahimong St. Joseph Shrine ang parokya sa Sasa. Subay sa tema: “Mapadayunong Pagkiglambigit sa Kristohanong Katawhan ni San Jose sa Tuig sa mga Kabus.”

Miabot sa 362 ka mga partisipante ug halos tanan kanila nagsuot og kolor green timaan nga sila “The Workers of St. Joseph.“

“Di ko makatoo nga ingon niini kadaghan sa mga tawo ug mga sakyanan nga mikuyog sa maong panawduaw, abi nako Bisita Iglesia lang,” kini ang mga komentaryo sa kasagaran nga miuban.

Adunay gihan-ay nga mga kalihukan sa matag bisita sa parokya sama sa pag-ampo ug testimony sa lima nga gitahasan sa paghatag niini. Ang maong pagpaambit, nakatandog usab sa mga balatian ug nagmatuod nga kinsa kadtong modangop sa panabang sa mahal nga patron San Jose segurado gayud nga dili niya balibaran.

Kini ang unang pilgrimage nga gihimo gawas sa parokya, ug may mipasibaw nga unta si Fr. Diony Tabiliran, ang parish priest motugot nga sa sunod tuig mahitabo usab kini ngadto sa ubang parokya gawas sa bikaryato sa St. James.

Puno sa kalipay ang tanan ilabina nga miingon si Fr. Diony nga ang mikuyog sa maong pilgrimage makadawat usab og mga indulhensya.

Napalawom ang pag-ila sa patron, puno sa paghigugma, kasuod sa matag-usa, bisan pa man sa kainit sa panahon, pero gibalewala sa tanan. Gitapos kini sa panalangin sa langit ug mga grasya sa kadasig sa usag-usa. (Amie Desquitado)