Gusto ka makabunga? Pabilin Kaniya!

Usa ka higayon niana kauban ang akong manghod didto sa among uma, nanguha’g mga bunga sa bayabas. Apan tungod sa kadaghan sa bunga among giputol ang sanga aron naay magunitan ug daghan ang among madala. Pag-abot sa balay gikasab-an sa among inahan kay unsaon pa daw pagpamunga sa mga sanga nga amo man giputol sa punuan niya.

Niining ikalimang Domingo sa Pagkabanhaw, mao usab kini ang gigamit ni Kristo nga hulagway sa atong ebanghelyo, ang hulagway sa usa ka punuan ug sanga. Si Kristo mao ang punuan ug kita ang iyang mga sanga. Kung gusto nato nga mamunga, magpabilin kita Kaniya.

Sama ni San Pablo diha sa atong unang pagbasa. Siya nagmabungahon bisan pa man sa mga pagpanglutos, pagdaugdaug ug pagduhaduha kaniya tungod kay siya nagpabilin Kaniya, nagpabilin siya kang Kristo. Apan unsaon nato pagpabilin kang Kristo? Si San Juan diha sa atong ikaduhang pagbasa nagkanayon, “Si kinsa kadtong magtuman sa iyang mga sugo, magpabilin sa Ginoo ug ang Ginoo magpabilin ngadto kaniya.” Sa atong ebanghelyo si Jesus mismo ang miingon, “Dili kamo makabunga gawas kung magpabilin kamo kanako… Ako ang punuan sa paras ug kamo ang mga sanga. Ang magpabilin kanako ug ako kaniya, mamungag daghan. Kay kung wala ako, wala kamo mahimo.”

Mga igsoon ko diha ni Kristo, sa atong panahon karon, adunay pipila sa atong mga igsoong katoliko ang mibalhin sa laing grupo kay lagi wala sila maka-bunga sa ilang pagka-katoliko. Kung atong hunahunaon, unsaon nila pagpamunga kung wala sila magpabilin Kaniya. Sa atong kasinatian, usahay kung dili matuman atong gi-ampo, dili ba kita mubiya sa Ginoo? Kung daghan na kaayong problima, wala ba kita mobiya Kaniya?

Kung atong balikan ang akong kasinatian human kami makasab-an sa among inahan, nakaingon ko nga kaigsoonan nga tama ang akong inahan, unsaon pa man pagpamunga sa sanga kung kini naputol na sa punuan niya. Mao nga sa atong pagka-katoliko, sa atong pagka-sanga ni Kristo, kung gusto kita nga makabunga? Magpabilin kita Kaniya!