Kitang tanan mga Anak sa Dios

Sa pagbisita sa Santo Papa niadtong Enero dinhi sa atong nasud dunay awit nga gihimo nga nag-uluhan “We are all God’s children.” Mao kini ang theme song sa maong hitabo. Maayo tingali atong balikan kini ug paabihon ioabi niining panahon sa Pagkabanhaw.

Tungod sa dakong gugma sa Dios sa kalibutan, iyang gipadala ang iyang Anak nga si Jesus, aron kinsa kadtong motoo Kaniya dili mamatay kon dili makabaton sa kinabuhing dayon (Jn. 3:16). Atubangan sa kahimtang sa katawhan nga nagsalikway ug misupak sa Dios, gugma ug kalooy ang iyang gipadayag ug gibalos pinaagi sa pulong ug buhat hangtod sa kamatayon diha sa mga kamot sa mga gamahanan, adunahan, ug dungganan niining kalibutan.

Apan, nabanhaw siya. Alleluia! Gilupig niya ang kadautan ug kamatayon sa tawo. Giusab niya ang ilang kahimtang. Gipahiuli niya ang mga tawo ngadto sa kaayo ug katarong sa Dios. Gipakamatyan niya ang diosnong bili ug dignidad isip mga anak sa Dios. Pinaagi sa kamatayon ug pagkabanhaw ni Jesus, nahimo kitang tanan nga sinagop nga mga anak sa Dios. Ug tungod niini, nahimong managsoon pagusab sa usag-usa luyo sa, ug bisan pa sa panaglahi ug panagaway sa kultura, kaliwat, ug relihiyon.

Kini ang pagsaylo, kining kausaban gikan sa daan ngadto sa bag-o, ang gisaksihan sa una niyang mga sumusunod ug mga Apostoles. Human sila nakasala, gipahiuli sila ni Jesus ngadto sa usag-usa ug ngadto sa Kaniya, ug giingnan, “ang kalinaw maanaa unta kaninyo.” (Jn 24:36). Siya ang niuna sa pakig-uli. Siya ang niuna sa pagpasaylo.

Kining kahibulangang pagbag-o sa pagkatawo, pinaagi sa gahum sa nabanhawng Jesus, ang kamatuoran nga ginasaksihan usab sa mga susmusunod ni Kristo hangtod karong panahona. Kining kamatuoran maoy gitinguhang patyon ug hunungon sa mga punuang pari ug mga punuan sa kaggamhanan sa panahon ni Jesus. Hangtod karon, ang maong paninguha nagkadako na ug nagkasindikato na, kakontsabo ang mga gamhanan, sapian ug mga dungganan.

HUMAN TRAFFICKING. Kini karon ang usa ka dakong hulagway sa sistimatiko ug organisadong pagpasipala ug pagdaot sa dignidad sa matag tawo, ilabi na ang mga babaye ug kabataan. Makita kini sa prostitusyon, drug addiction, sexual nga kaulipnan, substance abuse, child labor, pornograpiya ubp.

Giingon nato nga moderno na kita sa daghang butang. Bitaw! Apil na sa pagkamoderno mao ang modernong pagdagmal sa bililhong dignidad sa matag tawo nga gipakamatyan ug gibanhaw na ni Jesus. Ang HUMAN TRAFFICKING maoy usa sa dakong kaalaot sa daghan kaayong mga tawo karon. Kung tinuod nga nabanhaw na si Jesus ug uban kaniya, kita usab, nan dili mahimo nga magpakabuta, bungol, ug walay duyogkasakit sa mga naalaot sa atong palibot.

Ang atong Santo Papa Francisco maoy nangulo sa usa ka dakong panaghugpong sa tibuok kalibutan, gikan sa lainlain sektor, aron mahunong kining maong dakong krimen batok sa dignidad sa tawo.

Mapuslanon usab nga ang susamang paninguha unta mapahigayon sa lokal nga kahimtang. Ang Simbahan, mao ang institusyon nga maayo unta nga makasugod niini ilabi na sa atong mga parokya ug mga GKK. Angayan lamang nga himoon kini kay ang PCP II nagingon nga ang mga babaye ug mga bata tagaan ug dugang pagpakabana ug pagtagad sa iyang pagpangalagad.