Tan-awa, pakan-a, palandunga

Ikatulong Domingo sa Pagkabanhaw
Buhat 3:13-15, 17-19/ Ps. 4:2, 4, 7-9/ 1 Jn. 2:1-5/Lk. 24:35-48

Kung kita nabuhi pa panahon sa mga tinun-an ni Hesus, sayon kaha ang pagtuo nga si Hesus nabanhaw? Dili kaha sama kanila kita usab magduha-duha?

Diha sa mga pagbasa, si Hesus nagpakita sa iyang mga tinun-an aron sila mosalig nga Siya nabanhaw gayod. Lain-lain ang Iyang pamaagi aron sila makumbinse nga Siya buhi sa ilang taliwala. Iyang gihimo ang mga pamaagi aron sila malig-on sa ilang pagtuo.

Una, iyang gipakita kanila ang iyang mga samad. Iyang gitanyag ang iyang mga kamut ug mga tiil nga naagian sa mga lansang. Ang iyang mga samad timaan nga Siya tinuod gayod nga nabanhaw.

Sa panaw sa kinabuhi, kita usab mahimong samaran. Makaamgo unta kita nga kung kita samaran, nasakitan, napakyas, nagkulang, gisalikway, giluiban o gisulayan, kita dili Niya pasagdan. Ang Iyang mga samad pasalig nga Siya nakighiusa kanato kung kita samaran. Tan-awa ang Ginoo sa panahon nga ikaw samaran.

Ikaduha, Iyang gipadayag kanila nga Siya ubos nga nanginahanglan. Gigutom Siya ug nangayo og pagkaon. Siya mikaon sa atubangan nila. Nagpaubos Siya nga miangkon sa Iyang panginhanglan.

Sa atong kinabuhi, maamguhan unta nato ang presensiya sa Ginoo diha sa pagbati sa mga kabus nga nanginahanglan. Diha sa mga gigutom ug naglisod, nagpaduol ug naghulat ang Ginoo sa atong hinabang. Pakan-a ang Ginoo diha sa mga kabus.

Ikatulo, iyang gipasalig kanila nga Siya buhi diha sa Iyang mga pulong ug panaad nga matuman gayod. Ang iyang gisuli mahitabo gayod ug dili niya pakyason ang iyang gisaad.

Diha sa atong kinabuhi ang pulong sa Dios atong kalig-on. Tinuod ug dili bakak ang gisulti sa atong Ginoo. Gikan sa iyang gisulti kita mabuhi bisan sa panahon sa kalibog ug pagsulay. Palandunga ang pulong sa Ginoo sa kanunay.

Ang Dios nabanhaw gayod ug buhi sa atong taliwala! Sa kanunay, Siya atong tan-awon, pakan-on ug palandungon.