“Ang Eyukaristiya ug ang Pag-alagad sa Eyukaristiya”

Kini mao ang nahimong tema sa recollection sa mga miyembro sa Extra-Ordinary Ministers of Holy Communion (Lay Ministers) sa San Miguel Parish, Panacan, nga gipangulohan ni Bro. Sergio Ayag, niadtong Marso 21-25, 2015 sa Benedictine Sisters Center of Spirituality, Baganihan, Marilog District ning dakbayan.

Wala nahimong babag ang kalayo sa venue sa maong recollection diin gitambongan kini sa 51 ka mga miyembro sa maong ministriya, ug 11 niini mga bag-o.

Si Rev. Fr. Marbendear Morallas, DCD ang nahimong tigpasayon sa maong recollection. Gisugdan ni Fr. Dear ang recollection sa pagbasa sa Ebanghelyo ni San Juan 13:1-15 diin nagpunting sa hagit sa pag-alagad sa Ginoo pinaagi sa pag-alagad sa isigkatawo.

Ang matag sakop sa Extra-Ordinary Ministers of Holy Communion gitawag sa pag-alagad diha sa matag kasaulogan sa Santos nga Eyukaristiya pinaagi sa pag-abag sa pari sa pagpakalawat sa mga nagsimba. Apan ang pag-alagad, hilabina sa mga sakop sa Extra-Ordinary Ministers of Holy Communion, dili lamang magpabilin diha sa Santos nga Eyukaristiya, apan kini angay nga puy-an pinaagi sa pag-alagad sa mga taong mahimamat sa pinaka ordinaryong panghitabo sa panaw isip mga Kristiyanos.

Gipasabot usab ni Fr. Dear ang matag bahin sa Santos nga Eyukaristiya ug ang pagsaulog sa Easter Triduum, ang kahulogan niini, ug ang ilang kalambigitan niini sa kinabuhi isip sumusunod ni Kristo. Kabahin sa maong recollection ang pagdawat sa Sakramento sa Pakig-uli diin ang mga partisipante nagkompisal sa ilang mga kasal-anan ug naangkon ang kapasaylo-an.

Sa katapusan, gipahinumdoman ni Fr. Dear ang mga partisipante nga gikinahanglan kanunay andam nga modawat kang Kristo diha sa tagsa-tagsa ka kinabuhi aron ang tanan mahisama Kaniya. Ug gitapos niya ang maong recollection pinaagi sa pagsaulog sa Santos nga Eyukaristiya.

Gihatagan usab og pasidungog ang 11 ka mga sakop nga nag-alagad sa ministriya sulod sa 20 ka tuig ug gi-award sa Kura Paroko sa Parokya ni San Miguel, Panacan nga si Rev. Fr. Proceso “Jun” Gimeno, DCD ang ilang Certificate of Recognition. Mihatag usab si Fr. Jun og mga bulawanong pulong alang sa mga nagtambong. Isip Kura Paroko, gipahinumduman niya ang tanan nga ang matag usa, mga alter-Kristo (other Christ).

Gilauman niya nga pinaagi sa hiyas ug panig-ingnan sa matag sakop sa Extra-Ordinary Ministers of Holy Communion, mabati sa mga parokyano sa San Miguel Parish, Panacan ang matuod nga presensiya ni Hesus.

Mabungahon nga natapos ang maong recollection diin ang mga mitambong nga mga sakop sa Extra-Ordinary Ministers of Holy Communion napuno sa kaalam ug kadasig sa pagpadayon sa pag-alagad ug paghimo sa mga gimbuhaton sa ministriya. (Warren Rex Bautista)