Graduation sa mga Catholic Schools (Mati Newsbits)

Graduation sa mga Catholic Schools—Nagmalampuson ang graduation / commencement exercises sa mga tulunghaang Katoliko sa Mati diocese gikan Marso 19 hangtud Marso 26, una sa Gulf Towns ug katapusan sa Contra Costa. Si Fr. Edito S. Baño, apostolic administrator, kauban ang diocesan schools superintendent, Fr. Bienvenido B. Bersosa, ang nag-preside sa mga Baccalaureate Masses ug nagtabang pagtunol sa mga awards ug diplomas sa tanang Maryknoll schools—Lupon, Sigaboy, Manay, Lambajon, Cateel, ug ingon man sa St. Mary’s College sa Baganga ug St. Mary’s Academy sa Caraga, ug sa Immaculate Heart of Mary Academy (IHMA) sa siyudad sa Mati. Ang nagkadaiyang principal ug mga sakop sa school administration and staff ang nagpahiluna sa mga pagbansay sa mga mogradwar sa ilahang mga alma mater. Congratulations sa mga graduates ug mga ginikanan ug magtutudlo, ug panghinaut sab sa kalampusan sa sunod nga mga ang-ang sa kinabuhi.

Earth Hour—Hugot nga miduyog ang simbahan ug ang siyudad sa Mati ug probinsya sa Davao Oriental sa adbokasiya alang sa pag-konserbar sa enerhiya, kon koryente, pinaagi sa pagpartisipar sa kalihokan sa Earth Hour sa miaging sabado, Marso 28. Kini ang gipahayag ni Fr. Edito S. Baño, kasamtangang nagdumala sa apostolado sa komunikasyon sosyal sa diyosesis sa Mati, ug ni Mr. Yon Maybuena, Mati City Information officer. Gipasabot sa duha nga na-andan na kining buluhaton sa nangagi pa nga mga katuigan aron ipakita ang pagtamod sa pagprotektar sa kabuhatan/kinaiyahan, ug nga haom lamang kaayo ang tema nga “Use your power to change climate change”. Nunut usab sa mga panawagan sa radyo, mga residente, mga establisimiento, ug mga pampubliko ug pribadong sektor, ang nagpalung sa mga di-kinahanglanon nga mga suga ug signages lights gikan alas 8:30-9:30 sa gabii. Agig pagdugang usab sa pagpakabana sa katawhan, gipahigayon ang usa ka educational program and variety show sa Mati Park and Baywalk alas 6:30 sa gabii hangtud miabot ang oras sa Earth Hour ug ninghilom na ang tanan, lakip ang mga kahimanan sa broadcast.

Women’s Month Celebration—Nahimong kabahin ang DXHM-AM ug DXDV-Spirit FM sa Women’s Month celebration sa cuerpo sa kapolisan sa probinsiya sa Davao Oriental sa miaging Marso 23, 2015. Pinasidunggang dinapit mao ang batakang newswriter ug “cutest” broadcaster ug Catholic Herald contributor Ms. Leonila “Neela” G. Duallo, kinsa mabuotong nipaambit sa iyang kasinatian sa paghatud sa kamatuoran sa kahanginan isip newswriter/reporter, ug naghagit usab sa kababayen-an sa “paggamit sa ilahang mga gasa ug womanly charm alang sa pagpanalipod sa kahiusahan sa pamilya ug pagtahod sa tawhanong mga katungod alang sa malambuong kinabuhi ug pagmugna ug usa ka peaceful world.”