“Ang kalinaw maanaa kaninyo”

Pinaagi niining pagtimbaya, gipadayag ni Jesus ang bunga sa iyang pag-antos, kamatayon ug pagkabanhaw – PANAGDAIT, KALINAW. Busa, ang maong mga pulong maoy pagtimbaya sa panahon sa pagkabanhaw. Nabanhaw na si Jesus! “Ang kalinaw maanaa kaninyo!”

Mao kini ang gisaad nga panag-uli human sa pangluib, pamilya, pagsalikway, pangluib, pagpamakak, panglimod, apil pa ang iyang mga sinaligan nga mga tinawag ug piniling mga apostoles. Ang tubag sa Anak sa Dios, ang Diosnong katarong – pagpaubos, pagpasaylo, pakig-uli. Sa ingon mahunong ug dili na masumpayan pa sa lain pang sala ug dautan. Giduphan, gilansang, gipakamatyan niya ang ang mga sala sa uban, sa mga kaaway.

Impossibli kini. Oo, sa tawo impossibli! Apan, kay Jesus, nga tinuod nga Dios ug tinuod nga tawo, iyang gipahiuli ang tanan ngadto sa Dios Amahan pinaagi sa iyang masinugtanon ug mahigugmaong kasingkasing hangtod sa kamatayon. Tungod niini nadaog gihapon ang kaaway pinaagi sa iyang pagkabanhaw. Sa Dios walay impossibli.

Mga igsoon kong Mindanawon – Moro, Lumad ug Bisaya tinuod nga dugay na natong gimithi ang malinawon nga pamuyo ug sa pag-ugmad sa pagkinabuhi alang sa tanan sa atong yutang natawhan. Ang atong mga igsoong Pilipino sa laing rehiyon mao usab ang dugay nang gipangandoy. Nasayod ako nga sa makadaghan, naghunahuna kita nga dili kini posibli. Daghan nang panahon ang nausik. Daghan nang kinabuhi ang nasakripisyo, Daghan na kaayo ang mga gamhanan, sikat, ug mga adunahan nga mga politiko nga misaad og kalingkawasan. Lawom na kaayo ang mga samad sa nagbalikbalik nga panagway. Ang mga yutang kabilin nakuha na sa lain. Ang mga panaglahi halapad na kaayo ang agwat. Nagkahilis na ang mga butang nga maghiusa kanato sa usag-usa. Mas maayo pang MAGBULAG, MAGKINAUGALINGON.

Kitang mga tinuod nga Kristiyano, dili mahimong mawad-an og paglaom. Nagatoo kita nga hangtod karon, sa tanang dapit ug sa mga katawhan nga nanagsumpakiay ug nagpinatyanay tungod sa panaglahi, ang Dios nagmadaogon lang gihapon sa daghang mga gagmay ug dakong paningkamot sa pagtukod, paglig-on, ug paguli sa panagdait tali sa nagkalain lain nga mga tawo. Nagasalig kita nga ang gugma ug duyogkasakit, taliwala sa mga hagit ug hulga batok niini, modaog lang gihapon.

Maoy hinungdan, nga padayon lang gihapon kita nga makig-alayon sa ubang mga sektor nga mahigugmaon, makugihon, ug makatarunganong nagaduso sa dugang pang mga lakang padulong sa katumanan sa Kauswagan, Kagawasan, Katarong ug Kalinaw.

Kinahanglan labanan nato ang lainlain nga pwersa nga away, panagbulag, pagkabahinbahin ang tuyo. Labanan nato kining maong mga makadaot sa katawhan pinaagi sa pag gamit sa armadura sa Dios – Kamatuoran, Katarong, Gugma, Kagawasan alang sa tanan pinaagi sa hiniusang panlimbasug sa matag usa, sa nagkahiusang katawhan.

Ang Oktaba sa Pasko sa Pagkabanahaw – unang Dominggo hangtud sa ikaduhang Dominggo (8 ka adlaw) alang kanatong mga Katoliko Oktaba sa Diosnong Kalooy. Makahuluganang higayon alang kanato nga mapalawoman pa ang kahulugan sa atong pagka instrumento sa KALINAW.

ANG KALINAW MAANAA KANINYO!