Ang Bugtong Saksi sa Pagkabanhaw sa atong Ginoo

Buhat 10:34, 37-43 /Ps. 118 /Col. 3:1-4 or 1 Cor. 5:6-8 /Juan 20:1-9 or Lukas 24:13-35

Malipayong Pasko sa Pagkabanhaw kaninyong tanan!

Kon maghisgot gani kitag saksi sa pagkabanhaw ni Kristo, ang anaa sa atong huna-huna mao dayon ang mga tawo, sama sa atong nadungog karon diha sa Ebanghelyo, nga sila si Maria Magdalena, si San Pedro o si San Juan. Apan kon atong balikan ang Ebanghelyo, aduna pay usa nga bugtong saksi kon unsa gayod ang nahitabo sa diha nga si Kristo Gibanhaw o Nabanhaw.

Kini mao ang LUBNGANAN—“THE EMPTY TOMB.” Ang maong dapit, dapit sa mga patay. Gani kita adunay negatibo nga panghuna-huna o panlantaw kon maghisgot kita og lubnganan, kay lagi kini alang man sa mga patay, mao nga daghan ang mahadlok og lubnganan.

Apan niining Dominggo sa Pagkabanhaw ang lubnganan gihatagan og positibong kahulogan. Nga ang lubnganan nahimong bugtong saksi sa pagkabanhaw o maingon ta nga simbolo sa Pagkabanhaw. Nahimo siyang saksi o simbolo sa Pagkabanhaw dili tungod kay makalihok siya o makasulti siya kon dili nagpahiuyon lamang siya sa dihang gipahiluna ang patay’ng lawas ni Jesu-Kristo diha kaniya.

Nga sa ato pa mahimo usab kitang mga saksi ug magsasangyaw sa pagkabanhaw sa atong Ginoo kon ato Siyang hatagan og luna diha sa atong kasingkasing ug kinabuhi. Sama sa lubnganan, kon kita andam kanunay sa pagdawat kang Kristo mamahimo usab kitang mga epektibong magsasangyaw ni Kristo ug sa Iyang Ebanghelyo.

Apan kon magdumili kita sa pagdawat kang Kristo diha sa atong kinabuhi bisan kon magsasangyaw pa kita Kaniya, ang maong pagsangyaw walay kahulogan ug walay epekto kanato ug sa uban. Hinaot nga niining atong pagsaulog sa Pasko sa Pagkabanhaw makatuhop sa atong tagsa-tagsa ka kasingkasing aron kita mamahimong tinuod nga mga saksi sa Nabanhawng Kristo…