Semana Santa: Puyo sa balay o maglulinghaway?

Sa karaan…

Nahinumdum ko sa gagmay pa mi, pagabot sa Semana Santa ang palibot mag-usab. Ang mga istasyon sa radyo magsugod og patugtog og mingaw nga mga huni. Ang mga drama sa radyo mahimong ispiritohanon ang mga storya. Kasab-an mi magsulti og dako’g tingog. Magkatawa og kusog gidili kanamo. Ang mga pagdula sa mga bata gidili usab. Unya, ang sud-an mahimong gamay na lang ug simpli nga mga putahi. Karne gilikayan hangtod sa Biyernes Santo, wala na jud.

Sa maong Semana Santa, daw mohinay ug mohunong ang mga naandan nga gimbuhaton. Nabatasan usab ang dili pagsuroy-suroy. Ang pagtrabaho mohinay o mohunong gayud agi’g respeto sa kabalaan sa panahon. Panahon kini nga magpuyo lamang sa balay ug magkugi sa paghipos ug paghinlo sa panimalay. Tungod kay wala may TV ug internet, nagmamugnaon ang mga bata og batan-on aron sa pagpahimulos sa panahon.

Pipila lamang kini sa karaang paagi kaniadto sa pagsinati sa Semana Santa. Kanunay kaming pahimangnoan nga ang hinungdan sa mga kausaban mao kay kini ang panahon sa pagkamatay sa Ginoo alang sa mga sala sa kalibutan. Busa, magbinuotan kami og dili magpakasala aron mapanalanginan ug dili magabaan.

Sa ato pa, mabati gayud ang kalainan sa pag-abot sa Semana Santa dili lamang sa sulod sa Simbahan, apan sa mga panimalay usab ug sa sosyodad.

Sa karon…

Wala pa ang Semana Santa, nangandam na ang mga negosyo sa kalingawan ug lulinghayaw sa ilang mga produkto o mga luna nga kaadtuan sa mga buot magbakasyon, magpahulay, maglulinghayaw. Ang mga mantalaan, radyo ug labaw na ang TV puno sa inadlaw-adlaw nga pagpahibalo sa publiko bahin niining mga butanga. Makapalaway ug makadani gayud sa mga tawo sa mga butang lumalabay. Ang epekto niini, ang spiritohanon ug relihiyosong bahin sa Semana Santa, nagkawala sa paglabay sa panahon.

Kasagaran bakasyon na sa eskwela ang mga kabatan-onan niining panahon sa Semana Santa. Busa, ang mga advertisement nagpunting kanila, ug sila karon ang maningkamot sa pag-agni sa ilang mga ginikanan ug kahamtungan nga mangadto niining mga lugara.

Halos Biyernes Santo na lang gayud ang nahibilin sa karaan nga kasinatian sa Semana Santa. Ang mga malls manirado. Halos tanan negosyo sirado. Non working Holiday ang Biyernes Santo. Apil na usab ang mga sugalan sirado. Mga eroplano muminos ang mga biyahe. Mga stasyon sa radyo ug TV magminos og mga programa. Daghan kaayo ang manimba ug magpenitensya, kuyog sa stasyon sa krus ug procession sa Santo Entiero ug sa Madre Dolorosa. Ug dinhi niining adlawa magtapos ang Semana Santa.

Pag Sabado, dili na siya Sabado Santo. Back to normal life na. Balik tanan sa naandan.

Kamo, unsay magakahitabo sa inyong Semana Santa? Unsay inyong giplano ug gipangandaman alang sa inyong banay? Unsa kahay mahimong epekto sa inyong kinabuhi tungod sa inyong pagsaulog sa Semana Santa?

Akong panghinaot ug pag-ampo, nga magmakahuluganon ug mabungahon kini alang sa inyong padayon nga pakigharong sa mga hagit, hulga ug gumunhap sa kinabuhi sa atong kapanahonan karon. Magbunga unta kini sa KALINAW diha sa inyong tagsa tagsa nga kinabuhi ug uban sa inyong mga banay ug katilingban.

Balaanong Semana Santa kaninyong tanan.