Kalooy ug Duyog kasakit uban sa mga Kabus

“Bulahan kamong mga kabus kay sa inyo ang Gingharian sa Dios.” (Lk 6:20)

Ang kasagaran natong nailhan nga mga kabus mao sila nga sa makadaghan gigutom, giuhaw, hubo, nagmasakiton, walay panginabuhi, walay maayong puluyanan, ug walay edukasyon. Kining klaseng kakabus anaa ra sa atong taliwala. Bisan sa mga dagkong mauswagong siyudad, anaa sila sa mga kilidkilid o sa mga kadalanan ug ilawom sa tulay.

Apan duna pay laing matang sa kakabus. Kini ang kahimtang niadtong mga tawo nga nagapos sa lainlain nga mga bisyo ug sala. Ang daghan kanila naulipon sa mga struktura sa kaulipnan sama sa alkohol, prostitusyon, illegal nga droga, pornograpiya, sa sugal, bisan ang legal nga sugal nga gipahigayon sa kaggamhanan. Ug ang pinakadako niining mga struktura mao ang struktura sa korupsyon sa kinabuhi nga politikal. Matud pa sa pagsusi, kini maoy dakong hinungdan sa kakabus sa nasud. Mao kini ang gitawag nga kakabus sa immoral nga kinabuhi.

Ang ikatulong matang sa kakabus mao ang kasinatian niadtong dili motoo sa Dios, misalikway Kaniya ug mibalibad sa Iyang gugma. Nagatoo kini sila nga wala sila manginahanglan og Dios. Igo na ang tawhanong kaalam, kusog ug kabtangan aron molampos sa kinabuhi. Apan napakyas sila. Ang ilang garbo wala makaluwas kanila. Kini ang spiritohanong kakabus. Miingon ang Ginoo “Unsa may kapuslanan sa pag-angkon sa tibuok kalibutan, apan ikadaot sa imong kaugalingong kinabuhi?” (Lk. 9:25)

Kining maong mga kahimtang sa kakabus sa daghan sa atong mga kaigsoonan, angayan natong ilhon ug sabton nga dakong iskandalo sa sosyodad ug Simbahan. Dili kini pagbuot sa Dios. Busa, dili angayan dawaton na lamang ug pasagdan. Sama ni Hesus nga nalooy ug miduyogkasakit sa mga tawo sa nagkalainlain nilang balatian ug iyang giabog ang mga dautang spirito gikan kanila, dili usab kita magpakabuta bungol ug magmatig-a og kasingkasing.

Ang kakabus sa Ebanghelyo nga gipakabulahan sa Ginoo mao ang langitnon ug diosnong kakabus. Sa ato pa, mapaubsanon nga nagasalig, labaw sa tanan, sa kaayo ug gugma sa Dios, nga dili gayud Niya kita biyaan ni pasagdan. Ang kabus sa Ebanghelyo nagaila ug nagkinabuhi ubos sa paghari sa Dios—ang ginatawag natong “kahadlok sa Dios” (Prov. 9:10). Nagkinabuhi nga mahinulsulon ug matinuorong nagatuman sa pagbuot ug laraw sa Dios alang sa kaluwasan sa kalibutan.

Kining maong klase sa kakabus ang makapadato sa tawo. Madato tungod kang Kristo ug nahimong mahigugmaon ug maluwasnon alang ug uban sa kaigsoonan. Kon magpakadato man lang kita magpakadato kita kang Kristo nga kabus.

Sumala ni San Pablo Apostol ngadto sa taga Korinto, ang Ginoo, “bisan tuod adunahan siya, apan alang kaninyo nagpakakabus Siya, aron pinaagi sa iyang pagkakabus, madato kamo” (2 Kor 8:9). Sa ato pa, sa Gingharian sa Dios, ang kakabus sa Ebanghelyo giila nga mao ang kadato. Pinaagi sa pagpaubos ug pagsakripisyo, tungod sa gugma, ang kahimtang sa kaalaot sa kalibutan matagad ug maluwas. Karon masabtan nato, ngano sa kakabus anaa ang atong kabulahanan.

Nagpaubos ug nagpakakabus si Kristo “kay gihigugma pagayo sa Dios ang kalibutan, iyang gipadala ang iyang bugtong anak…” (Jn 3:16). Nagpakakabus Siya aron mahaduol Siya ug mahiusa sa katawhan ug masinati usab Niya ang ilang kahimtang. Nahisama gayud Siya kanila gawas lamang sa sala. Wala magmakuli si Kristo nga mosakrispisyo ug magpakamatay sa Krus alang kanato nga Iyang mga hinigugma. Mao kini ang gugma nga maoy kahulugan ug katuyuan sa iyang pagpakakabus. Sa ingon niini ang kalibutan naluwas ug natubos. (atangi ang ikatulong bahin sa sunod semana).