Unom katuiga nga balati-an, hingpit nga naangkon ang kaayohan

Pinaagi sa atong maayo ug dili maayong mga kasinati-an sa atong mga kinabuhi, hayag man kini o ngit-ngit, ana-a ang atong mahigugma-ong Ginoo nga andam sa kanunay sa pagiya ug patabang kanato aron kita mahimong iyang disipolo.

Ang matu-od nga kabag-ohan sa atong kaugalignon dili mahinayon sa kalit nga desisyon, apan sama sa atong Gino-ong Hesukristo muagi kita sa tukmang proseso aron atong mabato-nan ang hingpit ug ang matuod nga kabag-ohan alang sa atong kaugaligon.

Gitandog ni Fr. Fernando Suarez, ang gibantog nga healing priest sa nasud, ang unom na ka-tuig nga balati-an nga Disc Protrusion kon sakit sa spinal cord ni Bro. Rowel Bron Torrejos human siya ma-aksidente atol sa iyang pagpanarbaho sa bukid. Si Bro. Roel, 35 anyos, usa ka negosyante ug ang kasamtangang Chairman sa Corporal Works of Mercy sa Divine Mercy in my Soul Community sa tumong nga pagpangalagad sa atong Ginoo ug alang sa mga kabus pinaagi sa pagpahigayon ug mga feeding programs, Catechisms ug pagkapakylap sa Debosyon sa Divine Mercy ilabi na sa mga kabatan-onan ug sa tanan.

Nasugod ang debosyon ni Bro. Rowel sa Divine Mercy niadtong tuig 2013 sa dihang iyang nakita ang panagway sa Divine Mercy sa usa ka karatola nga nagapahibalo sa Life in God’s Mercy Seminar. Niadtong tungora, tayming sad nga nasinati ni Bro. Rowel ang di maayong panghitabo sa iyang kinabuhi sama sa iyang pagkaaksidente ug ang paghinay sa iyang negosyo. Siya daw nadat-ugan sa lagit ug yuta niadtong higayona.

Siya dili relihiyoso kaniadto apan karon matod niya: “Sa akong 33 years in my life, fist time ko ni simba sa San Pedro Cathedral, ug sa gustohon nimo o sa dili, moabot ang adlaw nga mangita gyud ka sa nawong sa Ginoo and out of my curiosity gusto gyud nako nga muapil sa Life in God’s Mercy Seminar.”

Atol sa pagbisita ni Fr. Fernando Suarez sa San Pablo Parish, Matina, sa pagsaulog sa World Day of the Sick ug sa Tuig sa mga Kabus niadtong Pebrero 19 naayo si Bro. Rowel ug sumala niya:

“Niadtong gipatindog na tanan nga naglingkod sa second row kauban ang akong asawa, papa, ugangan, unya pagkahuman nangatumaba na ang mga tao, ug giagi-an ko ug wala ko natumba. Unya gibalikan ko ni Fr. Suarez, ug natingala ko nganong sa kadaghan sa mga tao, ngano ako lang ang iyang gibalikan ug nagkaistorya mi for about 2-3 minutes then pagka ugma natingala ko kay for almost 6 years nga kada buntag magsakit ang akong likod unya devotee ko sa Divine Mercy ug ti-aw mona, wala koy gigasto everyday and for almost one hour nga imong bati-on ang tumang kasakit sa akong pagmata sa buntag ug karon, ingana ka graceful ang atong Gino-o nga iya akong gi-ayo ug unta kani nga panghitabo sa San Pablo madala unta sa San Antonio Parish sa Agdao.”

“Jesus really healed me through the hands of Fr. Suarez, ug bisan wala pa koy medico legal nga magsuporta sa akong claim, kay sa bisan isa kaadlaw lang nga wala nagsakit ang akong likod, for me, it’s already a miracle.”

Hangyo niya nga unta makabisita si Fr. Suarez sa San Antonio De Padua Parish sa Agdao aron matambalan ang atong mga igsoon didto nga adunay nagkadaiyang balati-an nga dili gayod makakaya sa pagpatambal ug aron sab nga susama ni Bro. Rowel sila mamaayo.

Karon, aktibo si Bro. Rowel sa mga kalihukan sa simbahan nga nakasentro sa pagtabang sa mga kabus ug sa pagpakusog sa debosyon sa Divine Mercy. (Lloyd Labanon)