Kasinatian sa Kalooy ug Duyog kasakit

Gihangyo ko kamo sa miaging Dominggo, nga palandongan ug ampoan nato ang mga tawo ug mga hitabo nga atong nasaksihan, sa layo man o duol, niadtong mga adlaw kanus-a si Papa Francisco uban kanato. Natandog ba kamo? Unsa diay ang mga nakatandog ninyo?

Sama sa akong giingon na nga kapila na ka okasyon akong nakahinagbo niya apan lahi gayud kining akong nakita, nadungog, ug nabati karon, uban sa akong mga kababayan ug kapamilya sa kinabuhi, mga igsoong magtoo diha ni Kristo.

Una sa tanan, dili lamang pipila ka minuto ug oras ang panagtagbo, kondili 3-4 ka adlaw nga panagtagbo pinaagi sa low tech, hitech, notech, ug labaw sa tanan, akong gitawag nga Spiritech. Pastilan! Dili ma-spelling ang mga kasinatian gayud, ug dili maigo ang unsa mang mga pulong ipahayag sa gibating pagduyog kasakit man o kalipay. Matod pa ni Papa Francisco, maghilom nalang, ihilak ug patuloa na lang ang mga luha, ug apil na ang paggunit na lang sa kamot sa Mama – si Mama Mary.

Alang kanako, ug tingali mao usab sa kadaghanan, ang pinaka tin-aw nga pinadayag sa tema sa maong pagduaw ni Papa Francisco mao ang nahitabo sa Tacloban niadtong Sabado, Enero 17. Didto ang Dios nagpadayag sa iyang kaugalingon sa kusog nga paagi, ginamit ang hinay nga tingog sa Papa, taliwala sa makusog nga ulan ug hangin, nga anaa Siya kanunay uban sa ilang kasakit ug kalisud. Nagsud-ong kang Kristo sa Krus ug naggunit sa kamot ni Mama Mary nga nagbarog sa tiilan sa krus, sa hilom nabati sa tanan nga ang Dios buhi gayud ug anaa mismo sa ilang kahimtang. Ug sama nga sila sa Tacloban milhilak, kita usab miduyog kasakit kanila, ug wala damha, ng amihilak pud. Kay kita usab nagapas-an man sa atong kaugalingong mga kasakit ug kalisud.

Niadtong mga adlawa, nagkahiusa kita, ug nakasinati og nasudnongpag-inigsoonay. Nahiusa kita sa hunahuna, kasingkasing, ug buhat: angSimbahan, ang Panggamhanan, ang Media, ang pribadong sektor nagtinabanggay ug nagkasinabtanay sa pagpahigayon sa tanang buluhaton. Sugod sa pagpangandam, ngadto sa kasaulogan, ug hangtod sa paglakawnani Papa Francisco. Misaka ang tanan sa taas nga ang-ang sa pagsinabtanay nga, sa akong pagtoo, Dios lamang ang may kapasidad ngamakahimo. Sa ato pa, ang Grasyang makahiusa, bisan sa mga panaglahi ug pagkabahinbahin.

Daghan pang laing mga pamalandong ug kaamguhan sa mga hitabo niadtong mga adlawa. Padayon kamo sa paghilom, pamalandong, paghilak, ug sakatapusan, paghimaya ug pagpasalamat sa Dios sa iyang mga kahibulungang mga buhat uban kanato iyang mga pinalanggang anak.