Pagmalipayon kamo kanunay

Ikatulong Domingo sa Adbiyento
Is. 61:1-2, 10-11/ 1 Thes. 5:16-24/ Jn. 1: 6-8, 19-28
Kining ikatulo nga Domingo sa adbiyento giila nga Domingo sa paglipay kon Gaudete Sunday. Gisaysay ni San Pablo kining maong kalipay nga maangkon pinaagi sa pag-ampo ug pagpasalamat ug sa ebanghelyo ni San Juan diha sa pagpaubos.

Ang katawhan nga maampuon malipayon. Nganu? Tungod kay ang pag-ampo mao man ang pagpakig-uban sa Dios. Ang maampuon kanunay nakasinati sa presensiya sa Ginoo. Bisan unsa ug bisan asa siya, ang maampuon mobati sa presensiya sa Dios. Duna pa bay kaguol o kasubo kon ang Dios atong kauban kanunay?

Ang katawhan nga mapasalamaton malipayon. Nganu? Dili ba diay ang tawong nakadawat sa grasya mapasalamaton man? Walay tawong nagpasalamat nga magul-anon. Ang tawo nga nakaamgo nga siya gihatagan tungod sa gugma sa naghatag bisan pa man siya dili angayan malipay nga modawat sa maong grasya. Siya mapasalamaton tungod sa kalipay sa pagdawat sa gihatag kaniya.

Ang katawhan nga mapaubsanon malipayon. “Ang pagdumot ug ang pagkamapahitas-on nagdala kanamo sa dakung kapildihan.” Kini mga pulong sa usa sa mga kanta panahon sa adbiyento. Diha lamang sa pagpaubos ug dili pagkamapahitas-on atong maangkon ang kalipay sa kinahiladman. Sa ebanghelyo, si Juan nga Magbubunyag malipayon nga midawat sa tinuod niyang pagka-siya. Iyang giangkon kung kinsa gayod siya atubangan sa Dios ug sa tawo. Wala siya mangangkon sa dili iya. Wala niya pahimusli ang iyang pagka-inila. Sayod siya nga ang pinili sa Dios, ang ipadala nga mosunod kaniya nga maoy gihisgutan sa unang pagbasa maoy angay nga simbahon ug ilhon nga manluluwas. Sayod siya nga siya nag-andam lamang sa tinuod nga gipaabot.

Manghinaut kita nga ang atong pagpaabot sa Dios mapuno unta sa kalipay, kanang kalipay nga dili mabayran sa salapi, kalipay nga dili dala sa butang kalibutanon ug lumalabay, kondili kalipay nga dulot sa kahiladman kanato. Kanang maong kalipay atong maangkon diha sa pag-ampo, pagpasalamat ug pagpaubos.