Kapitan ni Lord

Francisco “Francing” Buloy
Ka-abag, Sr. San Roque Chapel
Cambaleon GKK Zone 2
Brgy.Cambaleon, San Isidro, Davao Oriental

“Dili tanan nga magtawag kanako og Ginoo, Ginoo, makasulod sa gingharian sa langit, kung dili kadto lamang sa kabubot-on sa Amahan nga atua sa langit.” (Mateo 7:21).

Kini mao ang paboritong bersikulo sa Bibliya sa usa ka mag-uuma nga nahimong Barangay Kapitan sa ilang Barangay ug nanerbisyo isip usa ka Kaabag sa usa ka kapilya sa Davao Oriental.

Sulod sa baynte ka tuig, nangalagad sa kapilya sa Sr. San Roque GKK, Zone 2 sa Barangay Cambaleon, San Isidro, Davao Oriental si Francisco “Francing” Buloy, 60 anyos, minyo kang Aping Buloy, taga Purok Bangkok, Barangay Cambaleon.

Una siya nahimong Barangay Kapitan, nangalagad na siya isip usa ka kaabag nga mao ang hinungdan nga giistorya siya sa Kura Paroko sa ilang simbahan niadtong tungora ug gipapili kung iya bang ipadayon ang pagpangalagad sa simbahan o pangalagaran niini ang iyang mga ka-barangay.

Niadtong panahona, gipili usa ni Francing nga alagaran ang iyang mga ka-barangay sulod sa tulo ka tuig ug mi “laylow” usa kini isip usa ka ka-abag.

Human sa tulo ka tuig nga pagka Kapitan, misulay na usab og dagan si Francing para sa ikaduhang termino apan napildi kini, hinungdan nga mibalik kini isip usa ka ka-abag.

“Didto nako narealized ang kalahian sa pag panerbisyo sa simbahan tungod kay kung nangalagad ka sa Ginoo, daw dali ra nga masulbad ang mga nangabot nga problema ug adunay dakong kausaban kay makabuhat ka og maayo sa isig ka tawo. Daghan ko ug natun-an kabahin sa mga bersikulo sa Bibliya ug makatubag na sa mga pangutana kabahin sa Bibliya.”

Na tawhay usab ang iyang huna-huna ug iyang naobserbahan nga dali ra nila nga masulbad ang mga nangabot nga problema sa ilang pamilya kung adunay dako nga pagtoo ug kinasingkasing ang pag alagad sa Ginoo.

Bisan ang kapit-os sa kinabuhi tungod sa iyang pagka mag-uuma ug pagbuhi og mga hayop, iyang na obserbahan nga ginahatagan siya og grasya.

“Maski pa man nga wala mi gihatagan og anak sa akoang asawa, nalipay pod mi tungod sa among mga pag umangkon nga mao ang mosunod sa pagbantay sa akoang mga yuta nga tamnanan. Sa tinuod lang, wala koy pagbasol sa akoang pagpangalagad sa katawhan sa barangay ug pagpanerbisyo sa simbahan. Mao hinuon kini ang naghatag sa akoa og kusog sa matag adlaw.”

Ang iyang mensahe sa mga suking magbabasa sa Catholic Herald mao ang pagpadayon sa pagpanerbisyo ug pagsangyaw sa Maayong Balita kay makahatag kini og pagpalig-on sa kalawasan ug pang huna-huna.

Unta mahimo kini nga inspirasyon para sa atoang tanan nga palig-onon pa ang atoang pagtoo sa labaw’ng Makagagahom.
Atong alagaran ang Ginoo ug tabangan ang panginahanglanon sa atoang isigka tawo.
======
Let us tie that KNOT.
Send in your stories via our e-mail address. Add Kwento ng Ordinaryong Tao to your FB
friend’s list. ‘Til next k’wentuhan higala!