Pangandam sa moabot

Ikaduhang Domingo sa Adbiyento
Is. 40:1-5, 9-11/ Ps. 85:9-15, 11-14/ 2 Pt. 3:8-14/ Mk. 1:1-8

Daghan ang nakalitan sa miaging tuig tungod kay wala sila kapangandam sa gidahum na nga bagyong Yolanda. Bisan gipahibalo na nga dunay “storm surge” nga moabot, wala damha sa mga tawo nga ingun diay niadto kakusog ang bul-og sa tubig nga makamatay. Sa usa lamang kapamilok daghang kabtangan ug kinabuhi nakalas.

Kung ang adbiyento mao ang pagpaabot sa Ginoo, unsaon kaha nato pagpangandam niini?

Sa unang pagbasa, ang pagdasig maoy panawagan. Ang katawhan nga nangandoy og kahumanan sa ilang pag-antus ug gibati nga silot, gidasig sa Dios kansang kaluwasan moabot. Mahimo unta kitang katawhan nga madasigon aron kita usab makadasig sa uban. Diha sa atong pagkamadasigon kita usab makatakod sa atong isigkaingun.

Sa ikaduhang pagbasa, ang paningkamut nga mahimong putli ug walay ikasaway ug magpuyo sa pakigdait maoy giawhag. Sanglit ang pag-abot sa Dios dili matagna, ang pagtinarung sa kanunay, paghinlo sa kaugalingon, ang pagbuhat sa maayo maoy dakung hagit. Ang pagpangandam angayan mahimo sa kinahiladman sa atong tagsa-tagsa ka kasing-kasing.

Sa ebanghelyo, si Juan nga magbubunyag nag-andam sa pag-abot sa Ginoo ug nagpabiling mapaubsanon. Ang iyang pailob angay nga kapanaminan. Kung unsa man ugaling ang atong gustong mahitabo unta niining tuig 2014 nga mahitabo apan wala mahimo, angay kitang magpaubos. Kung duna man ugaling kitay pangandoy nga makita apan wala miabot, pailob ang kinahanglan. Dili unta kita mamugos sa atong plano kondili ang plano sa Dios dinhin kanato.

Busa inay mabisi kita sa pagpanindot lamang sa atong palibot pinaagi sa mag dekorasyon o mga aktibidades, atong paningkamutan ang tinuod nga diwa sa pagpangandam sa pag-abot sa Ginoo nga wala nato hisayri kanus-a. Matag adlaw kahigayonan sa iyang pag-anhi. Ang pag-abot sa Ginoo maghimo kanatong madasigon, putli ug makidaiton, mapailubon ug mapaubsanon.