Gitawag nga mahimong katekista

“Ang pagka-katekista diay usa ka tawag. Dili ikaw ang nagpili kon dili ikaw ang gipili sa Ginoo.”
Kini ang giingon ni Ana Maria Ungab, 44, usa ka katekista sa San Pablo Parish. Siya usa sa mga katekista sa San Pablo Vicariate nga mitambong sa gipahigayong Vicariate Catechists’ Day sa St. Francis Xavier Regional Major Seminary niadtong Nobyembre 16.
Ang San Pablo Parish gilangkoban sa mga parokya sa San Isidro Labrador sa Catalunan Grande, Our Lady of Lourdes sa Bangkal, Ascension of the Lord sa GSIS Heights sa Matina, ug San Pablo sa Juna.

Sa pakighinabi sa DCHerald, giingon ni Ungab nga malipayon siya sa iyang pag-alagad isip katekista tungod nag-alagad siya sa uban ug dili lang sa kaugalingon.

Sumala niya, dako usab nga hagit kaniya isip katekista tungod kinahanglan nga mahimo siyang ehemplo sa iyang pamilya pero dako usab iyang pagsalig sa Ginoo ug sa pormasyon nga iyang nadawat sukad kaniadto nga katekista siya sa kapilya hangtud naabot siya sa mga skwelahan nga giserbisyohan sa parokya.

Si Hilaria Cajipo, 59, dugay na usab nga nag-alagad isip katekista. Nagsugod siya niadtong 1998.
“Sa ako pagka-katekista, malipayon ako nga nangalagad ko sa Ginoo ug iya kong gi-gasahan og anak nga pari,” sumala niya.
Si Fr. Robert Adam Cajipo, nga gi-ordinahan niadtong Disyembre 29, 2011 ug kasamtangang nag-skwela gawas sa nasud mao ang anak ni Mrs. Cajipo.

Sumala niya, wala siya nagdahum nga mahimong pari ang iyang anak. Gipangayo niya sa Ginoo nga magka-anak og opat ug andam siya nga ihatag niya ang iyang anak sa pagpangalagad sa Ginoo. Tulo ang lalaki niyang anak ug adunay usa ka babaye nga maoy kinamagulangan. Si Fr. Adam ang ika-duhang anak ni Mrs. Cajipo.

Sa iyang pagka-katekista, nabati niya nga kulang ang iyang pagka-katekista kung kutob lang siya matag Domingo mu-simba ug kinahanglan mas taas ang panahon nga i-gahin alang sa Ginoo.

Dugang usab niya nga mas nadungagan ang iyang kahibalo mahitungod sa Katolikong pagtoo sukad nahimo siyang katekista.
“Padayon gihapon ko mangalagad hangtud kaya sa lawas,” sumala niya.

Samtang sila Ana Maria ug Hilaria dugay nang nangalagad isip katekista, si Reynaldo Villapaz, Jr., 21, wala pa niabot og tuig sa pagka-katekista sa San Isidro Labrador Parish. Nagsugod siya niadtong Mayo.

“Gusto nako magtudlo mahitungod sa Pulong sa Ginoo. Gusto nako makatabang sa uban pinaagi sa pagpahibalo mahitungod kang Hesus,” sumala niya.

Dugang pa niya nga tungod sa iyang pagtambong sa Kasaulogan sa Pulong mao na-aghat siya nga mangalagad isip katekista.
Giingon usab niya nga igahin niya ang iyang panahon sa pagpangalagad. Kung magtrabaho na siya, igahin gihapon niya ang iyang panahon ilabi na matag day-off sa pagtambong sa mga kalihukan sa parokya ug ilang Gagmay’ng Kristohanong Katilingban (GKK).