Pagbantay ug Pagtukaw

Unang Domingo Sa Adbiyento
Is. 63:16-17,19; 64:2-7/Ps.80:2-3,15-16,18-19/1 Cor.1:3-9/Mk.13:33-37
Nagutana ang pari sa tulo ka batan-on nga nagdula “Unsay inyong buhaton kon pahibaloon mo karon nga moatubang na kamo sa Ginoo?” Ang una mitubag: “Mangita ko ug pari aron mangumpisal sa akong mga sala.” Matod sa ikaduha: “Moadto ko sa Simbahan ug mag-ampo.” Miingon ang ikatulo: “Mopadayon ko sa akong pagdula.” “Dili ka mangumpisal o mag-ampo ba kaha?”, nangutana ang pari kaniya. “Nagtoo ko nga kabubut-on sa Ginoo bisan ang akong pagdula karon. Paaboton nako siya nga nagbuhat sa iyang sugo”, pasabot sa batan-on.

Sa unang pagbasa, ang mga Israelita nga napalagpot didto sa Babilonya, nakaamgo sa ilang pagkamakasasala. Ang kahimtang niining maong katawhan naglarawan unsay mahitabo kanato sa mga higayon nga mailad kita sa kadautan. Sa sinugdanan, magtuuo sila nga sila malipay, apan sa katapusan ilang mahiaguman ang kamingaw, kaulaw, ug hilabihang kaguol. Busa, ang Abyento nagtawag kanato sa pagpangandam sa pag-abot sa Ginoo diha sa pagkaamgo sa atong mga sala ug paghinulsol. “Ginoo, pabalika kami kanimo, pakitaa kami sa imong nawong ug maluwas kami.”

Apan maghinulsol kita dili sa paagi nga malumos kita sa kaguol ug kawalay paglaum. Ang mga Kristohanon sa Corinto, sa ikaduhang pagbasa, adunay daghang kakulangan apan nahimo silang mga sumbanan niadtong nagpaabot sa Ginoo. Nasayod ang Dios sa atong mga kahuyang, Taliwala niini, atong ablihan ang atong mga kasingkasing sa iyang mga gasa. Ang Dios naghimo ug mga katingalahang butang diha sa iyang katawhan, naghatag kanila ug mga gasa, naglig-on sa ilang pagkamakanunayon, ug naghimo kanilang mabinantayon sa ilang pagpaabot sa iyang pagbalik.

Busa, uban sa iyang panabang, magpaabot kita sa iyang pagbalik diha sa pagbuhat sa atong mga katungdanan nga matinud-anon. Gipahinumduman kita sa Ebanghelyo sa pagtuman sa mga buluhaton nga iyang gibilin kanato: ang atong tagsatagsa ka mga katungdanan ug ang atong mga apostolado ug ministeryo diha sa Simbahan. Magbinantayon ug magtukaw kita.

Adunay duha tradisyon mahitungod sa sugilanon nako sa sinugdanan. Ang usa nag-ingon nga ang ikatulong batan-on mao sa Dominggo Savio; ang laing usa moingon ang siya mao sa Luis Gonzaga. Dili na ko sigurado kinsa kanila, apan sigurado ko nga ang duha giila sa Simbahan mga mga Balaan.