CM Fiesta/ Feeding Outreach

Ang Carmelite Missionary (CM) Sisters sa Mati nagsaulog sa ilang congregational fiesta sa miaging Nobyembre 8, sabado, kapistahan usab sa ilang pundador si Blessed Francisco Palau, pinaagi sa pagpahigayon sa ilang tinuig nga Family Day—pagtapok sa mga pamilya sa mga madreng CM nga taga Mati ug mga pamilya usab sa ilang mga cooperators ug CM-seculars. Mga pamilya Beltran(sa Mati) ug Berso (sa Sigaboy) ang nakatambong, ug kapin 60 ka mga hamtong ug mga bata ang nagtapok sa hamugaway nga hardin sa kamadrihan kon diin usab gisaulog ang Fiesta Mass uban nila Bishop Pat Alo, presider, ug Fr. Angel Crisostomo, MI, homilist. Gipahitabo usab ang mga pagduwa, kalingawan, ug pakigpulong kabahin sa mga pagtulun-an ni Bl. Palau nga nagduot sa iyang masibotong debosyon ug pagdepensa sa Simbahang Catoliko. Sa laing bahin, gilusad sa CM niadtong Nobyembre 10 ang ilang ika-upat ka tuig sa Feeding Program for Schoolchildren pinaagi sa paghalad sa Stos nga Misa sa Belsonda Elementary School, 7:30am, uban sa mga tinun-an ug magtutudlo. Matag lunes, mierkoles ug biyernes (MWF), ang mga madre mogahin sa pagkaon nga lutoon sa mga inahan para sa mga 230 kapin nga mga bata, kini hangtud sa Oktubre sunod tuig. Gihimo ang maong programa sa miaging tulo ka tuig sa mga gagmayng tulunghaan sa Culian, Buso, ug Tua-Tua sa Mati City. Si Sr. Everlita Huete, CM, ang kasamtangang naghupot sa mga programa sa Outreach ug CMS.