Ika-3 nga Pista sa St. John Paul II Parish gisaulog

“Dako akong pasalamat nga miabot mi nianing tuiga. Malipayon mi kay ang among patron, si St. John Paul II usa ka milagrosong santo.”

Kini ang giingon ni Luz Deala, 53, usa ka katekista sa GKK San Miguel Campo 5 Riverside, Los Amigos, nga nahisakop sa St. John Paul II Parish, nga nagsaulog sa ika-3 nga kapistahan, Oktubre 22—adlaw nga si kanhing santo papa, St. John Paul II nahimong santo papa niadtong 1978.

Pinaagi sa misa nga gipangulohan ni Archbishop Emeritus sa Dabaw, Abp. Fernando R. Capalla, malipayon nga gisaulog sa mga parokyano ang kapistahan sa parokya pahinungod kay Pope John Paul II.

Sa iyang pagpaambit, giingon ni Archbishop Capalla ang pipila sa mga milagro nga nahitabo panahon sa World Youth Day 1995 nga gihimo dinhi sa Pilipinas diin mibisita si Pope John Paul II.

Gawas niana, giingon usab niya nga sumala sa Philippine National Police, walay na-report nga krimen niadtong panahona samtang naa si Pope John Paul II sa Pilipinas.

“Ang mga tawo naghuna-huna mahitungod sa balaang bisita. Ang positibo nga huna-huna usa ka enerhiya nga maka-apektar sa palibot,” sumala ni Abp. Capalla.

Dugang niya nga ang katilingban sa karon, sa makita sa mantalaan, napuno na sa korupsyon ug kini nahimo nang social cancer.

Giingon ni Abp. Capalla nga kung adunay kahusay sa tawo—sa iyang kalag, diwa, ug lawas, mahimong maayo ang epekto niini sa uban, sa pamilya ug ilabi na sa katilingban.

Giingnan usab niya ang katawhan nga anaa sa Misa nga unta mahisama sila kay St. John Paul II nga maampuon, suod sa Diyos.

Si St. John Paul II usab ang nagsugod sa mga panagtapok sama sa World Meeting of Families ug ang World Youth Day nga maoy usa sa mga hinungdan nga daghan ang mga kabatan-onan ang napukaw sa ilang pagtoo ug mibalik sa Simbahan.

Sumala sa kura paroko nga si Fr. Pedro Maniwang, si St. John Paul II ang panig-ingnan sa matag usa sa usa ka maayong sulugoon tungod sa iyang pagdawat sa responsibilidad isip santo papa.

Gipasalamatan usab niya ang mga lideres ug mga miyembro sa katilingban nga mitubag sa tawag sa pag-alagad ug nagtabang nga mamahimong malampuson ang ilang pagsaulog sa kapistahan.

“Malipayon ang atong patron nga nagsud-ong kanato,” sumala ni Fr. Maniwang.  (@johnfrancesf)