World Day for Victims of Disaster

Kini ang natigayon o gi-obserbar niadtong October 13, 2014 sa pagpanguna sa Camillian Task Force sa St. Camillus Hospital of Mati alang sa siyudad sa Mati.

Gihalad ang usa ka ispesyal nga Santos nga Misa alas 4:00 sa hapon sa Camillian Martyrs Chapel nga gipangulohan ni Hospital Administrator Fr. Angel Crisostomo, MI (Ministers of the Infirm).  Gisundan kini sa mga testimonya sa pipila ka mga biktima sa kalamidad sa Super typhoon Pablo nga mihapak-hugno sa Contra-costa sa Davao Oriental niadtong Dec. 4, 2012.

Gipasabot ni Fr. Angel nga agi kini og pag-ila sa mga kasinatian sa pagbangon ug pagtoo sa mga biktima, sanglit ang pagpa-ambit nila ang mas mopaga-an pa sa ilang mga gibati karon, ug magsilbi usab kini nga kapanalanginan ug ingon man, panig-ingnan sa uban, partikular na ang determinasyon ug kaisog nga mabuhi ug magpakabuhi human sa kalamidad.

Kahinumduman nga ang nasudnong Camillian Task Force, sa pagduyog usab sa St. Camillus Hospital, ang naghatag og assistance sa mga biktima, kung asa nahimong tutok ang Brgy. Lambajon sa Baganga, nga usa sa mga grabeng na-apektuhan gayud sa bagyo.

St. Therese Fiesta

Mapasalamaton ang mga kaparian sa Society of Divine Vocations (SDV), ang nagdumala sa St. Therese Pre-College Seminary sa ilang malampusong pagsaulog sa ilang fiesta patronal ni Sta. Teresita sa Batang Hesus niadtong Octubre 1, 2014.

Mga pulong sa pasalamat ang giluwat nila Fr. Alfredo Briones, SDV ang superior, ug ni Fr. Randy Diamante, SDV, seminary oeconomus – sa tanan nga mitambong ug mitambong, ug labaw sa tanan kang Bishop Patricio H. Alo, D.D. nga nangulo sa Concelebrated Eucharistic Celebration alas 10:00 sa buntag sa St. Therese Seminary Chapel. Puno sa kasadya ug singgit sa mga batang gi-alagaran saOutreach ang seminary grounds, kon diin gipaambit ang tanan sa giandam nga paniudto ug gipahigayon nga mga kalingawan, labi na alang sa daghang mga bata.

Gipaila usab ang duha ka mga bag-ong giordenahang paring SDV nga sila si Frs. Oliver Maningo taga Samal ug John Villarete taga Tacurong, Sultan Kudarat.  Ang duha ang giordenahan niadtong Sept. 20, 2014 sa Naples, Italy, uban sa laing 10 ka mga paring SDV gikan sa lain-laing mga nasud atol sa kasaulogan sa congregasyon sa centennial sa kamatayon sa ilang pundador nga si Blessed Fr. Justin.

Ang maong mga SDV priests ang migradwar sa St. Francis Xavier Regional Major Seminary (Remase) ug si Fr. Maningo ang idestino sa ilang seminaryo sa Indonesia, samtang si R. Villarete ang mag-alagad isip oeconomus sa ilang seminaryo sa Catalunan Grande.  Ang homilist sa Misa mao ang labing unang Vocationist priest sa Mati kon mission founder, si Fr. Nicola Martino, SDV, kinsa mainitong nagpulong ug gani nag-awit kabahin sa halandong gugma sa Diyos ug ni Sta. Teresita.

Gitimaan usab ang kapistahan ni Sta. Teresa de Hesus o Sta. Teresa de Avila sa Oct. 15, 2014 pinaagi sa kasaulogan sa Eukaristiya nga gipangunahan ni Obispo Patricio Alo alas sais sa buntag sa dakong kapilya sa monasteryo sa mga madreng Carmelita sa Order of Discalced Carmelites (OCD) didto sa Tuatua, Matiao, Mati City.