Katekista nagtuon bahin sa Doktrina mahitungod sa Santo Papa

Aron mas makasabot ang mga katekista mahitungod sa Santo Papa, gihimo sa John XXIII Catechetical Center (JCC) ang formation sa mga katekista sa nagkalain-laing vicariate sa Archdiocese of Davao.

Niadtong Oktubre 11, gihimo ang formation sa St. James Vicariate nga gilangkoban sa St. Joseph the Worker Parish sa Sasa, San Miguel Parish sa Panacan, St. Francis Xavier Parish sa Tibungco, St. James Parish sa Bunawan, ug St. John the Baptist sa Lasang diin gihisgotan nila ang doktrina sa Santo Papa.

Ang formation gihimo sa seminar house sa St. John the Baptist Parish, Lasang.

Si JCC Director, Msgr. Maximo Sarno ang naghatag og pagpasabot mahitungod sa Doktrina mahitungod sa Santo Papa ug unsa ang role niya sa Vatican ug sa tibuok Simbahan.

Si Sr. Ma. Lydia Perales, TDM naghatag og lecture mahitungod sa kinabuhi ni Pope Francis ug unsa ang iyang mga kaagi una siya nahimong Santo Papa.

Tungod kay muabot man si Pope Francis sa Pilipinas karong Enero 2015, gihimo ni Jing Saniel sa JCC ang pagpasabot sa Pastoral Letter sa Catholic Bishops’ Conference of the Philippines (CBCP) nga nag-awhag sa tanan nga mangandam sa pag-abot sa Santo Papa.

Sumala ni Sr. Perales, nakahatag sa iya og inspirasyon ang maong panagtapok tungod bisan pa man sa kalayo sa mga lugar diin gikan ang mga katekista, wala nila kini nahimong babag aron muapil sila sa maong pormasyon.

Gani, adunay usa ka katekista nga gikan sa Mapula, Paquibato District nga nagdala sa iyang lima ka bulan pa lamang nga anak sa pormasyon tungod walay mubantay niini.

Gihimo kini sa JCC aron mas daghan ang maka-apil sa pormasyon ug aron mas mahimong epektibo ang mga katekista sa ilang pagpanudlo. Himoon ang vicariate catechists formation sa umaabot nga mga adlaw sa mga parokya sa Archdiocese of Davao.