Mabungahong Pagpangalagad

Niadtong Septiembre 27, 2014, gipakita sa mga Lectors, Cantors, Commentators ug Psalmists sa Our Lady of Lourdes Parish, Bangkal, Davao City, nga sila andam ug madasigon usab mogahin ug bilihong panahon sa pagpaambit sa ilang kaugalingon sa mga kaigsoonang Badjao. Kini pasiuna pa lamang sa mga musunod pang mga kalihukan nga pagahimoon sa ministriya sa LCCP sulod sa duha ka tuig nga programa pinasubay sa tema: LCCP: INSTRUMENTO SA DAKONG GUGMA SA GINOO PINAAGI SA PAGPANGALAGAD NGADTO SA KABOS. Kining mga kalihukang pagpaambit ngadto sa mga kabos tubag usab sa kinatibuk-ang tema sa parokya nga: KALIG-ON SA RELASYON SA DIOS, TUBURAN SA MABUNGAHONG PAGPANGALAGAD.

Pinaagi sa pagkoordinar ngadto sa mga Charles Borromeo Sisters nga maoy incharge sa Badjao Literacy Program for Matina Aplaya Badjao Community natigayon ang pakigsandurot sa mga LCCP ngadto kanila. Tungod kay daghan man sa mga LCCP ang nagsaulog sa ilang adlawng natawhan sa bulan sa Septiembre, ilang gipili nga magsaulog uban sa mga kaigsoonang Badjao agi ug pagpasalamat sa Ginoo sa gasa sa kinabuhi.

Sa pagkakaron adunay kapin kon kulang singkwenta (50) ka mga bata ug batan-ong Badjao nga nahasakop sa programa. Ang Literacy Program dili gayud matigayon kon walay sulod ang tiyan sa mga tinun-an. Lunes hangtud Biernes libre ang paniudto niadtong naa sa elementary sa Matina Aplaya Central Elementary School. Matod pa ni Sr. Cris Lagunsad, CB, nga maoy incharge sa programa, milagro sa Ginoo nga nasustinir nila ang programa. Ang ilang Lay Mission partners ug mga donors maoy misuporta sa programa. Ang adlawng Sabado espesyal alang sa mga Badjao. Sa “Balay Paglaum” nga gipahimo sa Charles Borromeo Sisters alang kanila didto sila makaligo ug tarong kay wala intawon silay tubig sa ilang panimalay tungod sa kawad-on. Didto sila mamahaw, mag tuon ug mag tutor. Human sa ilang paniudto, aduna silay film viewing nga mga educational. Usa sila manguli sa ilang balay didto sa daplin sa dagat, segurohon sa mga Charles Borromeo nga adunay sulod ilang tiyan. Mao kini ang sagad kalihukan kon Sabado. Inig kaDominggo, aduna usab silay kalihukan sa ilang simbahan isip mga Pentecostal.

Sa pagkakaron, aduna nay Badjao nga nakatungtong sa unang ang-ang sa Kolehiyo sa St. John Paul 11 College ug ang iyang asawa nga mao ang katimbang ni Sr. Cris Lagunsad, CB, naa sa programa sa Alternative Learning School (ALS). Sa dili madugay sugdan na usab ang programa alang sa mga ginikanan niining mga Badjao. Pagatudluan sila ug “organic farming” ug gamiton nila ang bakanteng luna sa Charles Borromeo. Dili kini sayon tungod kay ang mga Badjao wala maenad ug panguma kay sila mga mangingisda man. Apan kumbinsido si Sr. Cris nga sa ngadto-ngadto makakat-on sila sa panguma alang sa ilang kaayuhan.

Yano lamang ang gipatigayon nga pakigsandurot sa LCCP ngadto sa mga kabataan ug pipila ka mga batan-ong Badjao. Nakadayeg ang LCCP sa maayong pamatasan, disiplina ug pagkamaampoon sa mga bata ug batan-ong Badjao. Tungod sa gugma nga nadawat niining mga Badjao ilabina sa pag-atiman kanila sa Charles Borromeo Sisters, sila nahimong adunay kumpyansa sa kaugalingon, malipayon, intelihente ug masanduruton sauban.

Nanguli ang mga LCCP nga malipayon ug busog sa kaalam tungod kay daghan silang nakat-onan ug naamguhan nga nakapadugang sa pagpalambo sa ilang kinabuhi. Ang ilang diwa sa misyon napukaw ug buot kini nila nga ipadilaab pa pagsamot aron makatabang sa uban pang kabos nga nanginahanglan sa ilang panabang. Unta, daghan pa ang adunay kasing-kasing alang sa kabos nga magpaambit aron bisan sa ginagmay’ng pamaagi makatagamtan ug kaluwasan sa lawas ug kalag ang kaigsoonang kabos. Pinaagi niining mga buhat sa gugma, matagamtaman unta sa mga kabos ang gugma ug kalooy sa Ginoo kanila bisan unsang relihiyon sila nahasakop.