Importante kamong kabahin sa Diyosesis -Obispo sa Tagum sa mga Kaabag

TAGUM CITY—Unsaon sa Obispo kung siya nag-inusara, unsaon sa mga kaparian ang mga parokya kung wala ang mga kaabag?
Kini ang giingon sa Obispo sa Tagum, Bishop Wilfredo Manlapaz sa kapin upat ka libo nga mga kaabag kon pangulo sa liturhiya atol sa paghimo sa panagtapok sa mga kaabag sa tibuok Diyosesis sa Tagum niadtong Oktubre 11, didto sa Christ the King Cathedral.
Gisaulog usab niadtong adlawa ang ika-34 nga anibersaryo sa Diyosesis sa Tagum.

“Importante kamo nga kabahin sa diyosesis. Kung wala mo, mingaw ang dioceses. Wala miy mahimo,” giingon ni Bp. Manlapaz.
Giingon usab ni Bishop Manlapaz nga dako ang iyang pasalamat sa mga kaabag ug mga GKK leaders sa Tagum nga aktibong milihok sa ilang tagsa-tagsa ka mga GKK.

Dugang usab niya nga sa iyang 28 ka tuig isip Obispo sa Tagum, gatusan ka mga pari na ang iyang na-ordinahan ug kadaghanan kanila mga anak sa kaabag.

Tibuok adlaw gisaulog ang panagtapok sa mga kaabag nga sa karon anaa na sa ika-lima ka tuig. Kauban usab sa selebrasyon ang duha ka Obispo sa Dabaw nga nag-gikan sa Diyosesis sa Tagum: Bishop George Rimando nga naghatag og pagpaambit sa ecclesiological foundation sa GKK ug si Archbishop Romulo G. Valles nga nagpaambit mahitungod sa spirituality of the laity.

“Malipayon ko sa pag-alagad. Kaniadto nangayo ko sa Ginoo nga hatagan ko niya og regular nga trabaho aron wala nay babag sa akong pag-serbisyo kaniya ug gihatag niya kini,” sumala ni Abelardo Caluban, 46, nga nagtrabaho sa DOLE-Stanfilco ug usa ka kaabag Kapalong, Davao del Norte.

Dugang niya nga kung wala man siya nahatagan og regular nga trabaho, padayon gihapon siya sa pagserbisyo ug mapasalamaton siya nga wala siya gihatagan og mga pagsulay nga dili niya kaya atubangon. (@johnfrancesf)–