Ang Dios Dili Magkwenta

Ika-25 nga Domingo sa Ordinaryong Panahon
Is. 55:6-9/ Ps. 145:2-3, 8-9, 17-18/ Phil. 1:20-24/
Mt. 20:1-16

Duna bay pinalabi ang Dios? Dili ba pantay ang iyang pagtagad? Nganong bisan ang mga luya sa binuhatan ug pagtoo iya mang gantihan?

Atong hinumdoman nga ang Ebanghelyo karon dili sambingay sa hustisya. Kung atong hunahunaon dili pantay ang bayad sa nanuhol ngadto sa mga trabahante. Ang Dios tinuod labaw pa sa pinakagamay nga gipangayo sa hustisya. Walay gitikasan ang Ginoo sa sambingay nga gipapelan sa agalon kay siya matinumanon sa sabot. Wala siya’y giilad kay nisugot man sila sa sabot. Gituman sa agalon ang ilang sabot sa mga trabahante. Ang Dios usab makanunayon ug motuman sa iyang saad sa pagdawat kanato bisan sa atong kakulangan.

Dunay uban kanato motubag sa tawag sa Dios sayong panuigon. Apan ang uban usab sa ulahing bahin na sa ilang kinabuhi. Dili dungan ang atong pagkahamtong sa pagsunod sa kabubot-on sa Dios. Ang uban sukad sa bata pa masinugtanon na sa pag-alagad sa Dios. Ang uban kanato makaamgo lamang nga magbag-o kung sila luya na sa panglawas. Kita usab gipahinumdoman nga dili unta masina niadtong ulahin na nga mobalik sa Dios. Bisan sila ulahi na nga makaamgo, sila usab gidawat gayod sa Dios. Wala kitay katungod nga masina sa kaayo ug kamanggihatagon sa Ginoo bisan pa man kita nagtuo nga kita mas maayo ug mas buotan pa kay kanila.

Ato untang paningkamutan nga kita magmatinud-anon sa atong panaad sa bunyag. Molihok unta kita dili lamang sa panahon nga kita luya ug nag-antus na sa atong dautang binuhatan. Magmganggiluy-on unta kita inay masinahon. Mosalig kita sa kaayo sa Dios ug magmapasalamaton sa iyang pantay nga paghigugma alang sa tanan. Siya Dios nga dili magkwenta.