VDP magsaulog sa 53rd Parochial Fiesta

Ang Parokya sa Virgen Dolorosa magsaulog sa iyang ika-53 katuig nga kapistahan karong Setyembre 15 sa Babak duyog sa tema: Maria: Modelo sa Layko.

Adunay mga nagkalain-laing mga aktibidadis ang nakalinya isip pagpangandam sa maong kapistahan.  Ang Novena Mass pagasugdan sa Setyembre 6 sa alas singko sa hapon. Mga  Imbitadong pari ang momisa kada adlaw.  Nagpadayon usab ang pagpanindot sa altar pinaagi sa paghimo ug bag-ong retablo nga butanganan sa imahe ni Mama Mary ug sa tabernakulo.

Sa laing bahin nagasugod na usab ang liga sa basketball ug volleyball alang sa mga pangulo sa GKK ug center organizations inubanan sa amateur singing contest.  Adunay pagahimoon nga programa human sa ikaduhang misa ug mga parlor games sa may parish basketball court.

Ang mga nagkalain-laing eskwelahan sa Babak mopasundayag usab sa ilang field demonstration ug Drum and Bugle Corps isip ilang paagi sa pakiglambigit sa kapistahan.

Gilauman nga si Arsobispo Romulo Valles, D.D ang mag selibrar sa pagahimoong misa sa alas 8:00 sa buntag.  Aduna usab kumpirma sa Setyembre 6 sa alas 9:00 sa buntag ug bunyag sa bisperas sa pista sa may alas 10:00.

Malaumon si Msgr. Nelson Lucas ang kura paruko nga magmalampuson ang pagselebrar sa pista karong tuiga pinaagi sa pagtambayayongay sa PCC ug mga taga GKK inubanan sa kanunay’ng panabang sa Mahal nga Birhen Dolorosa.