Pagtuo lang ba aron kita maluwas

Brod palihug hisayri ko kon unsay kahulogan sa Langit ug unsaon nato nga kita makaabot niini? Salamat kaayo! Ako diay si Brod Cocoy of Panacan, Davao City.

Daghang Salamat Brod. Sumala pa sa tudlo sa atong Simbahan ang Langit mao ang hingpit nga katumanan sa lawom natong gipangandoy  nga labing taas nga kalipay nga atong mabati. “1024: This perfect life with the Most Holy Trinity – this communion of life and love with the Trinity, with the Virgin Mary, the angels and all the blessed – is called “heaven.” Heaven is the ultimate end and fulfillment of the deepest human longings, the state of supreme, definitive happiness, (Catechism of the Catholic Church, CCC1024).

Busa sa Langit usab hingpit nga kinabuhi ug gugma diin nagpuyo ang Dios nga labaw sa tanan, uban sa iyang mga halangdong mga binuhat ang Mahal nga Berhing Maria ang Rayna sa Langit ug sa yuta, ang mga Angheles ug  mga Santos ug kadtong mga  namatay nga anaa sa estado sa grasya sa Dios ug hingpit nga nahinloan sa ilang mga sala ug nabuhi uban ni Kristo hangtud sa kahangturan.

Didto makita nila ang Dios, “face to face”. (CCC 598). Mao nga ang langit usa ka hingpit nato nga puluy-anan diin mabati usab nato ang hingpit ug tinuoray nga kalipay hangtud sa kahangturan.

Ang Balaang Kasulatan naghulagway sa mga nagkadaiyang kahulogan ug kahimtang mahitungod sa langit, sama sa : usa ka gingharian sa Dios, gingharian sa Amahan ug gingharian ni Kristo (cf. Mateo 5:3, 13:43, Lucas 22:30 ug Marcos 9:46). Gitawag usab kini og balay sa Amahan, siyudad sa Dios, balaang dapit ug langitnong Jerusalem (cf. Juan 14:2, Hebreo 12:, 9:12), Paraiso, kinabuhing walay katapusan, kalipay sa Ginoo, korona sa kinabuhi, hustisya ug himaya, koronang walay pagka-dunot, dakong ganti ug walay katapusang himaya (cf. 2 Corinto 12:4, Mateo 19:16, 25:21, 5:12, Santiago 1:12, 2 Timoteo 4:8, 1 Pedro 5:4, 1 Corinto 9:25, Efeso 1:18 ug Hebreo 9:15).

Aron makasulod kita sa Langit kinahanglan gayud nga mobuhat kita sa giwali ni Hesukristo. Una, mao ang Pagtuo nato ngadto sa Dios (cf. Marcos 16:16), ikaduha, pagbuhat sa imong gitohuan(cf. Roma 2:5-6), ikatulo, pagsunod sa kasugoan sa Dios, ikaupat, pagpasakop sa matuod nga Simbahan (cf. Efeso 5:23), ikalima, pagkinabuhi sa grasya ug pagdawat sa mga Sakramento ug sa Lawas ug Dugo ni Kristo (cf. Juan 6:40-56), ikaunom, pagpaambit sa uban (cf. 1 Timoteo 4:13-16),ug ikapito, pagkamalahutayon o perseverance (cf. Mateo 24:13).

Si Hesukristo nag-ingon, “Ayaw kamog kaguol, salig kamo sa Dios ug salig usab kanako sa balay sa akong Amahan adunay daghang mga lawak ug moadto ako aron pag-andam ug dapit alang kaninyo, kondili pa kini tinuod dili unta ko kamo sultihan niini, ug kon atua na ako didto ug makaandam nag dapit alang kaninyo mobalik ako ug kuhaon ko kamo aron bisag asa ako atua usab kamo. Nahibalo kamo unsaon pag-adto sa dapit nga akong adtoan, apan si Tomas miingon kaniya Ginoo, wala kami mahibalo kon asa ka paingon, busa unsaon man namo pagka-tultol sa dalan? Si Hesus mitubag, “AKO ANG DALAN, ANG KAMATUORAN UG ANG KINABUHI”, walay makaadto sa Amahan kondili moagi kanako” (Juan 14:1-6).

Busa ang Ginoo nag-andam na gayud ug luna kanato ngadto sa balay sa iyang Amahan nga mao ang LANGIT diin angay kitang maningkamot usab sa pagsunod kaniya.