Kadayawan 2014, malamposon

Bisan pa man sa hulga sa terorismo, nahimong malamposon ang selebrasyon sa Kadayawan sa Davao nga gidugok sa mga turista nag gikan sa laing nasud ug laing parte sa Mindanao.

Daghan ang nalingaw sa Indak-indak sa Kadalanan niadtong Agosto 16, adlaw’ng Sabado nga gilangkuban sa 17 ka mga partisipante nga mga taga dakbayan sa Davao ug sa laing parte sa Davao Region.

Gidugok usab ang Floral Float Parade pagka adlaw’ng Domingo diin gipakita ang kabuhong sa dakbayan sa Dabaw sa mga prutas ug maanindot nga mga bulak.

Nahimong kampiyon sa Indak-indak sa Kadalanan ang Matiao National High School sa Mati City ug kampiyon sa Pamulak Kadayawan ang Barangay Kapitan Tomas.

Samtang sa Traditional Float Category, nahimong kampiyon ang International Pharmaceuticals Incorporated (IPI).

Nahimong Hiyas sa Kadayawan ang pambato sa Ata tribe nga si Susan Batawan, samtang Hiyas sa Kalamboan si Chaly Lou Macaran sa Matigsalog Tribe, ug si Kessia Carol Tar sa Bagobo-Klata Tribe ang nahimong Hiyas sa Panaghiusa.

Tungod sa hulga sa terorismo sa dakbayan, gibawal sa Davao City Police Office (DCPO) ang pagdala ug mga back pack ug mga butanganan og tubig nga dili transparent ang kolor.

Hugot usab ang pagpahigayon og mga check points sa entry ug exit points sa dakbayan  sa kapulisan ug mga sakop sa Task Force Davao.

Dako ang pagpasalamat ni Mayor Rody Duterte ngadto sa mga Dabawenyo nga nahimong peaceful ang selebrasyon ug sa pagdayo sa mga turista nga naggikan pa sa laing nasud ug miadto lamang sa dakbayan aron masinati ang kaanyag sa dakbayan.

Sa pagka karon, balik sa normal na ang kahimtang sa dakbayan sa Dabaw samtang padayon ang katawhan nga magpasalamat sa Ginoo sa abundang gasang padayon nga ginaangkon.