Pagtuki sa Kamatuoran

Ni : Bro. John Reyes ug Bro. Ronald Rondina
Catholic Faith Defenders
San Antonio de Padua Parish, Agdao, Davao City
Email: john_faith06@yahoo.com

Good Day Brod John Reyes and Brod Ronald, We are bless to your wonderful column, nakatabang gayud kanamo sa PAGTUKI SA KAMATUORAN. Mangutana lang ko.  Makaluwas ba kanato kon magpasakop ta sa Simbahan? Salamat!  Ako diay si Rodsky Rojas taga San Antonio Parish, Agdao, Davao City.

Daghang Salamat igsoong Rodsky sa pagsubay sa atong artikulo, bahin sa imong pangutana nga makaluwas ba kon magpasakop ta sa Simbahan.  Makaluwas gayud, ug bout lang namong iklaro nga ang Simbahan gayud ni Kristo ang angay tang pasakopan. Niining panahona daghan ang nag-gula nga mga nagkada-iyang pundok o sekta karon ug halos silang tanan moingon gayud nga sila iya ni Kristo.

Si Hesukristo mismo nagpahimangno kanato: “Pagbantay kamo ug ayaw kamo palimbong ni bisan kinsa. Kay sa akong ngalan daghang Tawo ang mag-ingon nga ako ang Mesiyas ug daghan ang malimbongan” (Mateo 24:4-5). Busa sa kanunay magtuki gayud kita sa kamatuoran aron dili kita malingla ngadto sa sayop nga pagtulun-an.

Ang Simbahan gitukod ni Hesukristo (cf. Mateo 16:18) aron maoy atong giya ngadto sa pagkab-ot sa kaluwasan. Iya kining giulaan sa iyang kaugalingong bililhon nga dugo (cf. Buhat 20:28). Ang Simbahan mao ang lawas ni Kristo  ug Siya mao ang ulo niini (cf. Colosas 1:18).

Kitang katawhan nga binunyagan kabahin sa maong lawas nga mao ang Simbahan ug siya mismo ang manluluwas niini (cf. Efeso 5:23). Busa gikinahanglan gayud nga magpasakop ta sa maong Simbahan aron makaplagan nato ang tunhay nga kaluwasan. Pinaagi sa Simbahan, atong makaplagan ang mga pagtulun-an nga iya gayud sa atong Ginoo sanglit si San Pablo miingon nga “Ang Simbahan mao ang haligi ug sukaranan sa tanang kamatuoran” (1 Timoteo 3:15). Ang Simbahan mao ang bag-ong Arka sa Kaluwasan nga ang tanang tawo sa kalibutan gidapit gayud sa pagpahisakop niini.

Ang Ginoo nagtinguha nga ang tanang tawo  maluwas ug makabaton sa kamatuoran (cf. 1 Timoteo 2:4). Pinaagi usab sa Simbahan atong makuha ang mga grasya sa Dios pinaagi sa pagdawat sa mga Sakramento nga maoy mopabalaan kanatong tanan. Ug ang Simbahan nga iya ni Kristo sa walay lalis nga kamatuoran ug natala diha sa kasaysayan mao ang SANTA IGLESIA KATOLIKA APOSTOLIKA ROMANA nga maoy bugtong Simbahan lamang nga naglawig sa kalibutan sulod sa 2000 kapin nga katuigan (Cf. THE NEW BOOK OF KNOWLEDGE ENCYCLOPEDIA vol.16 p. 237 ). “The history of the CATHOLIC CHURCH begun in upper room in Jerusalem almost 2000 years ago…JESUS FOUNDED THE CHURCH to carry all men into salvation (GROILER ENCYCLOPEDIA vol.5p.106 “Catholic Church is a Divine society FOUNDED BY JESUS CHRIST”). Mao kini ang mga pipila ka standard nga reperensya nga mopamatuod nga ang Simbahan nga Katoliko mao gayud ang Simbahan nga iya ni Kristo. Busa angay gayud nga magpasakop kita niini kon gusto kita makakaplag sa kamatuoran nga gibilin ni Kristo sa iyang Simbahan ug makabaton ug kaluwasan uban sa pagkinabuhi nga matarong. “The sole Church of Christ which in the Creed we profess to be one, holy, catholic, and apostolic, . . . subsists in the Catholic Church, which is governed by the successor of Peter and by the bishops in communion with him. Nevertheless, many elements of sanctification and of truth are found outside its visible confines”(LG 8, CCC 870).