Debosyon sa Inahan sa Kalooy

Ang debosyon sa Mary Mother of Mercy ginasaulog sa matag Nobyembre 16. Usa kini sa mga titulo ni Berhen Maria diha sa daghang mga titulo sa atong Inahan ug Rayna sa Kalibutan. Si Maria may titulo usab sama sa Inahan sa Fatima, Inahan sa kanunayng panabang, Inahan sa Santos nga Rosaryo ug uban pa. Kining titulo ni Maria isip Mother of Mercy daghan usab ang mga nag debosyon niini. Unsa ba kining pag debosyon? Ang pag debosyon usa kini sa mga kabahin sa atong pagtoo ug makatabang sa atong pagpahiduol ngadto sa Ginoo. Nagpasabaot usab nga ang atong pagtoo wala naka sentro sa atong pagdebosyon hinoun makatabang kini sa atong pagpahiduol ngadto sa atong manluluwas nga mao si Kristo.

Ang pagdebosyon sa Mary Mother of Mercy, dako ug ikatabang kanatong mga katoliko nga kita mapahiduol sa grasya sa kalooy sa Dios. Atong hinumduman nga si Maria ato usab nga Inahan nga may kinaiyang mabatyagon sa iyang mga anak. Isip siya atong inahan ug Inahan usab sa atong Ginoo mahimo siyang tulay sa pagabli sa makigrasyasyang kalooy sa Dios nga atong gipangayo pinaagi sa atong pagdebosyon sa Mary Mother of Mercy.

Angay usab nato maklaro sa pagsabot nga ang atong pagdebosyon niining titulo ni Maria nga isip Inahan sa grasyang kalooy dalan lamang sa atong pag-angkon sa kalooy ug grasya sa Dios. Ato usab nga hinumduman nga atong Ginoong Hesukristo lamang ang adunay katakos sa paghatag niining grasya sa kalooy. Susama na lamang sa imahin sa kanunayng panabang nga nagkugos sa batang Jesus nga kita nagasalig sa kalooy sa batang Jesus pinaagi sa pangama ni Maria. Si Jesus nga atong Ginoo siya mao ang atong modelo mao gani nga diha sa bunyag nga atong nadawat unya kita mamahimong susama kaniya. Apan usahay ang atong pagsunod sa atong Ginoo dili sayon, mao nga pinaagi sa atong pagdebosyon ilabi na gyod niining atong Inahan sa kalooy matabanagan kita nga madawat nato ang kalooy sa Dios. Ang kalooy sa Dios nga mohatag nato ug kadasig nga makasunod kita kaniya. (Sem. Reldin Remotigue)