Medical Mission sa ika-20 sa Sagrada Pamilya

Medical Mission ug uban pang serbisyo gipahihayaon atol sa ika-20 nga anibersaryo sa katukuran sa Parokya sa Sagrada Pamilya sa Barangay Dumoy ug Baliok niadtong Oktubre 5 nga nagsugod sa alas 7:30 sa buntag. Ubay-ubay sa mga parokyano ug mga lumulupyo nga sakop niini ang nakabenipisyo sa maong serbisyo.

Adunay 6 ka mga dentista, 2 ka pediatrician, 1 ka OB Gyne, 2 ka internist, 1 ka medical doctor, 1 opthalmologist ug 4 ka optometrist. Kini inubanan usab sa pipila ka mga pharmacists ug medical technicians.

Nikabat sa 90 ka mga indibidwal ang nahatagan sa serbisyong optical, 110 ang naibtan ug ngipon, 250 ang nakadawat sa serbisyong medical ug laing kapin 200 ang nisumite para sa FBS, bone screening ug ECG. Pagkahuman sa check-up sa mga doctor, duna usab gipanghatag nga tambal ug mga vitamins.

Malipayon usab ang pipila ka mga mitambong tungod sa libreng gupit alang sa mga lalaki ug naa pay pakapin nga pakilay alang sa mga babaye.

Wala gibati ug kagutom ang mga mitambong tungod adunay libreng lugaw ug lomi nga gipang apod-apod sa mga donors ug volunteers.

Nagpasalamat ug dako ang nangulo sa medical team nga si Dr. Ruby Ann Ruiz-Limpot tungod sa medical practioners ug volunteers nga migahin ug oras sa paghatag ug serbisyo sa katawhan. Iya usab nga gipasalamatan si Fr. Roger Duhaylungsod, ang kura-paroko tungod isa yang paggiya aron mahan-ay ang maong kalihukan.

Sa kinatibuk-an, nagmalapuson gayod ang gipahigayong Medical Mission sa parokya tungod sa pagtinabangay sa mga GSLs ug ubang organisasyong nisalmot sa sa maong kalihukan. Nilungtad hangtod 1:00 sa hapon ang maong aktibidad. (Flor Arellano-Deloria, Holy Family Parish SoCCom | Photos by Barbara Jensen Bula)