PWD’s hisgotan sa National Liturgy Conference sa Dabaw

Liturgy for Persons with Disabilities (PWD)—kini ang usa sa mga hisgotanan sa umaabot nga National Meeting of Diocesan Directors of Liturgy (NMDDL) nga pagahimoon dinhi sa syudad sa Dabaw, Agosto 11 hangtud 14.

Subay sa tema nga “The Liturgy for Special Groups”, ang Archdiocese of Davao maoy host sa ika-29 nga NMDDL, diin hisgotan ang Ecclesiology of Basic Ecclesial Communities, Liturgy and BEC, Liturgy with Children, Liturgy of Transparochial Communities ug Liturgy for Persons with Disabilities.

Sumala ni Sr. Johanna Bernabe, OSB, sa Archdiocesan Liturgical Center of Davao ug NMDDL Secretariat Committee Chair, giimbita ang Our Lady of Victory Training Center sa Sasa, Davao City nga inila sa pagtabang sa mga PWD aron mamahimo silang productive citizens bisan pa sa ilang kahimtang sama sa vocational training and employment ug health and physiotherapy services nga moapil niining tigum.

Dugang niya nga makatabang ang conference aron mapasabot sa kadaghanan ang mga butang mahitungod sa liturhiya ilabi na ang pagsaulog niini alang sa mga PWDs nga apil sa ministriya sa Simbahan.

Sa pagkakaron, kapin 250 ka mga delegado sa tibuok Pilipinas ang gitakda nga muabot sa Dabaw ug gipakusgan ang pagpangandam niini kauban ang mga pastoral agencies ug mga parokya sa Archdiocese of Davao.

Gi-awhag usab ang mga kaparian sa Dabaw nga musalmot niini ilabi na nga kabahin sa conference ang The New English Translation of the Rite of Marriage for the Philippines ug The New English Translation of the Rite of Confirmation nga gi-aprubahan na sa Catholic Bishops’ Conference of the Philippines (CBCP) niadtong milabay’ng bulan.

Himoon ang NMDDL didto sa MerGrande Ocean Resort, Talomo, Davao City.

Sa mubong pagsubay mahitungod sa NMDDL nga gisaysay ni Fr. Joel C. Caasi, ALC Director sa Davao, ang maong kalihukan ginahimo matag tuig sa tibuok Pilipinas aron ma-update ang mga liturgy directors, liturgy professors sa seminaries ug schools of theology ug mga graduates sa Paul VI Institute of Liturgy in the Philippines mahitungod sa liturgical concerns, ma-promote ang coordination tali sa Episcopal Commission on Liturgy, ug aron usab mapakusgan ang ilang panag-uban.

Gihimo ang unang NMDDL sa Tagaytay City ug kini ang ika-duhang higayon nga mag-host ang Archdiocese of Davao sa maong meeting. Kahinumduman nga gihimo niadtong September 7 to 10, 1998 ang NMDDL didto sa Cursillo House, F. Torres St., Davao City.