Ang Unang Lakang sa Pag-debosyon kang San Miguel: Usa Ka Pagbag-o sa Panimalay sa Pagtoo

Ang San Miguel Parish – Panacan nagpalapad sa ilang mga pamaagi aron mapalig-on ang debosyon sa mga parokyano ngadto sa ilang patron, si San Miguel Arkanghel. Atol sa tibook bulan sa Septembre, gipasiugdahan ang usa ka halapad nga Formation Program nga gitutokan sa pagtudlo ug pagpahibalo bahin sa debosyon ug gahum ni San Miguel. Ang programa gipasiugdahan sa Formators Ministry, nga gipangulohan nila Annabel Parra, Devonne Keith Obongen, ug mga miyembro sa ministriya sa pormasyon nga diin ilaha sab kining gilahad sa mga GKKs, Ministry meetings, ug mga Misa sa tibuok parokya.

Ang unang bahin sa pormasyon mao ang pagpaila sa Chaplet of San Miguel, usa ka espesyal nga pamaagi sa pag-ampo alang sa pag-ila sa gahum ni San Miguel ug ang iyang papel sa pagpanalipod sa mga kalag batok sa daotan. Ang Chaplet, nga gipaila sa mga parokyano sugod niadtong Septembre 8, gipakita dili lamang isip usa ka instrumento sa debosyon kondili usa ka pamaagi sa pagpakusog sa personal nga relasyon sa Ginoo pinaagi sa pangamuyo. Gisugdan usab ang pagbaligya ug mga Nobenahan ug Chaplet of St. Michael aron magamit sa mga katawhan sa pagpangadye matag adlaw.

Niadtong Septembre 15, gisundan kini sa usa ka sesyon nga naghatag og mas lawom nga pagsabot kon kinsa si San Miguel. Gigiyahan sa mga formators ang mga parokyano sa paghinumdom sa iyang papel isip lider sa mga anghel ug mga sundalo sa Dios batok kang Satanas.

Ang mga Novena Masses nga nagsugod niadtong Septembre 20-28 naglakip sa nagkadaiyang paksa nga naghatag og lawom nga pamalandong. Gilahad ang mga Panan-awon ni Papa Leon XIII ug ang importansya sa pagkahibalo sa Sala ug Sakramento sa Kumpisal, diin gipahinumduman ang mga parokyano sa gahum sa Dios nga magpasaylo ug sa papel ni San Miguel sa pagtabang sa mga kalag nga mapanalipdan gikan sa mga sala.

Gihisgutan usab ang Indulhensya, nga usa ka grasya sa pagpamuyo sa buhat ug debosyon, ug ang pagtoo nga si San Miguel naggiya ug nagpanalipod sa mga kalag sa Purgatoryo, ug nagtrabaho aron mahatagan sila og kahayag ug kapahulayan.

Niadtong mga katapusang adlaw sa nobena, giduso ang mensahe sa pagpalig-on sa pagtoo sa katawhan ug ang pagpakigbatok sa dautan pinaagi sa pagdasig sa matag usa sa ilang debosyon. Usa ka espesyal nga sesyon bahin sa hilisgutan nga si Satanas ug ang iyang panlimbong gipahigayon aron mas masabtan sa mga parokyano ang pamaagi sa pagdepensa batok sa paglingla sa yawa.

Sa katapusan nga mga adlaw sa nobena, ang mga formators mipasundayag og pagdasig sa mga parokyano nga ipadayon ang ilang pagsalig ug pagtoo, labi na sa diha nga ang pagsulay ug kalisdanan moabot. Gipahinumduman ang tanan nga ang pagtoo kinahanglan kanunay nga buhi ug palig-onon pinaagi sa pag-ampo ug debosyon kang San Miguel.

Ang San Miguel Parish Panacan, sa ilang padayon nga pagtinabangay, nagtinguha nga palamboon ang pagtoo ug debosyon sa mga parokyano pinaagi sa pagpaila sa Chaplet of San Miguel ug sa mga kalihokan nga nagpalig-on sa espiritwalidad sa katawhan. Kini nga pormasyon dili lamang usa ka pagpahibalo, kondili usa ka pag-amuma sa kasingkasing ug kalag nga mahibalik sa iyang patron, nga tigpanalipod ug giya sa ilang paglakaw sa kalibutan nga puno sa mga pagsulay.

Ang simbahan nagpadayon sa iyang misyon nga mapadako ug mapalig-on ang debosyon sa mga parokyano ngadto kang San Miguel Arkanghel, aron mahimo siyang simbolo ug giya sa matag adlaw nga kinabuhi sa katawhan. (Ma. Joneila B. Laruya)