Dugang Gasa sa Bokasyon Gisaulog sa Diyosis sa Tagum

Uban sa dakong pagpasalamat sa gasa sa bokasyon, niadtong Septembre 27, 2024, si Rev. Jestoni Javinez Udal, CS, usa ka Scalabrinian Missionary, giordinahan sa pagkapari sa San Agustin Parish sa Gredu, Panabo City, Davao del Norte. Ang maong kasaulogan gipanguluhan sa obispo sa Diyosis sa Tagum nga si Most Rev. Medil S. Aseo, D.D.

Ang seremonya sa ordinasyon nagpasiugda sa kamahinungdanon sa sakramento, nga nagagikan sa misyon nga gitugyan ni Kristo ngadto sa mga apostoles, nga gipahayag sa Katesismo sa Simbahang Katoliko. Kini nga sakramento dili lamang mohimo sa nakadawat nga mahisama kang Kristo apan makahimo usab kanila sa paglihok isip Iyang instrumento sulod sa Simbahan, ug pagtuman sa mga tahas sa pagkapari, pagkahari ug pagkapropeta.

Atol sa seremonyas, gihatagan og gibug-aton ni Bp. Aseo ang kamahinungdanon sa Eukaristiya isip sangputanan sa Kristohanong kinabuhi ug nag-awhag kang Rev. Udal sa pag-amuma sa iyang kaugalingon sa espirituhanong paagi aron epektibo siyang makapangalagad sa katawhan. Ang maong kalihokan usa ka selebrasyon sa pagpadayon sa apostolikanhong ministeryo, nga giila sa Simbahan nga kinahanglanon alang sa kaluwasan sa mga kalag.

Ang ordinasyon ni Rev. Udal ngadto sa pagkapari usa ka testamento sa nagpadayon nga tawag sa pagkabalaan ug pag-alagad sulod sa Simbahan, nga nagpakita sa kaanindot sa tradisyon sa ministriya sa pagkapari. Sa iyang pagsugod niining bag-ong ang-ang sa iyang kinabuhi isip pari, miduyog siya sa han-ay sa mga gitawag sa pagbantay sa katawhan sa Dios, nga naglangkob sa gugma ug kaluoy ni Kristo sa iyang pastoral nga buluhaton. (Sem. Resty Cabahug)