Pag-ampo sa Santos nga Rosaryo

“Marriage is a vocation. It is not a social event,” kini nga mga pulong pahinumdom gikan sa kura paroko sa Our Lady of Assumption Parish nga si Rev. Fr. Marlon Reyes, SSS atol sa ika-32 nga kapistahan sa GKK Sto. Rosario sa El Rio Vista Village, Bacaca niadtong Oktubre 6, adlawng Dominggo. Puno sa mga nanimba dili lamang ang kapilya apan apil sab ang gym sa El Rio tungod kini man usab ang ilang pagsaulog sa ilang ika-33 nga anibersaryo sa Homeowners Association.

Ang Pangulo sa Katilingban nga si Mrs. Bernardita Garzon, mapasigarbuhon nga nagpaambit sa ilang mga gihimo nga kalihokan isip pagpangandam sa maong kapistahan. Dili lamang sa pisikal pinaagi sa mga clean up drive apan apil pa ang espiritwal. Gani, una nagsugod ang Santos nga Misa, dunay katesismo nga gipahitabo alang sa tanan, mga pagpasabot ilabi na diha sa atong pagkapiniyalan.

Tungod niini, matapos ang pagsaulog sa Santos nga Misa, dunay gift-giving nga gipahitabo sa gym alang sa usa ka gatos ka mga kabataan. Mapasalamaton ang tanan sa mga benefactors ug sponsors labi na diha sa mag-asawa nga sila si Atty. Jane Bacayo ug Dr. Tess Bacayo.

Sumala pa ni Fr. Marlon, daghan na ang mga naguba nga kaminyoon tungod sa kakulang sa pag-ampo sa managtiayon. Iyang hagit sa mga pamilya, nga ang tanan mag-ampo labi na ang pagpangayo sa pangaliya sa Birhen sa Santos nga Rosaryo.