Pagpadayon sa Pagka-Piniyalan Isip usa ka Simbahan

“Ang atong patron, naay espada, mao nay ilugit, maoy iputol. Maayo pag lugita (mata), putla (kamot), kon makadaot nimo nga dili ma-qualify sa pagsulod sa langit,” kini ang mga pahinumdom ni Most Rev. Romulo G. Valles, D.D., atol sa Pontifical Mass niadtong ika-30 nga kapistahan sa San Miguel Parish Panacan, Septembre 29, 2024. Diha sa iyang mensahe, iyahang gihatagan og gibug-aton ang gahum ni San Miguel Arkanghel aron manalipod sa katawhan batok sa daotan.

Ang tema sa kinatibuk-ang selebrasyon mao ang “Pagsaulog sa 30 ka Tuig nga Kapistahan: Mapadayonong Panaw sa Pagka-Piniyalan Isip Usa ka Simbahan,” nga gisugdan pinaagi sa duha ka misa dayon ang Pontifical Mass nga gipangulohan ni Archbishop Valles, uban si Rev. Fr. Mervin George Maglana, Kura Paroko. Ang misa nagdala og kalipay ug paghigugma sa matag parokyano atol sa kapistahan ni San Miguel Arkanghel nga maoy ika-26 nga Dominggo sa Ordinaryong Panahon sa liturhiya.

Matapos ang mga misa, gisugdan ang programa nga adunay tema nga “Pista sa Nayon”, pinaagi sa usa ka Fellowship lunch, nga nagpakita sa panaghiusa ug pagtinabangay sa mga sakop sa parokya. Pagkahuman, gipahigayon ang Creative Folk Dance Competition, diin ang mananaog mao ang Sona 1, gisundan sa Sona 9, ug Sona 5. Human niana, ang mga tradisyonal nga mga duwa sa Larong Pinoy sama sa Dampa, Kadang-kadang, Sack Race, Tumba Lata, ug Piko gipasiugdahan sa San Miguel Parish Youth Apostolate (SMPYA), nga nagdala og kabibo sa mga partisipante.

Gitapos ang selebrasyon pinaagi sa usa ka Community Dance nga gidumala sa PREX Panacan, ug ang gabii gitapos sa usa ka Live Band Jam diin nagtipon ang mga parokyano. Tuod gayod ang gozos ni San Miguel sa pag-ingon, “Si San Miguel maoy giya, magtutudlo ug mag-uuna.” Kini nagpahinumdom sa paggiya ug pagpanalipod ni San Miguel sa matag binunyagan.

Ang sunod na sab nga pangandaman ug gina-antisipar sa parokya ni San Miguel Panacan mao ang umaabot nga Pastoral Visit sa maong Arsobispo sa Davao, Romulo G. Valles karong Oktubre. (Ma. Joneila B. Laruya | Photos: Arkanghel – San Miguel Parish Panacan FB)