Kinasing-kasing nga paghatag, makahatag og kalipay

Sa panahon karon daghan ang nag-ingon nga pipila na lang kanato ang adunay kasing-kasing aron magpakabana nga motabang sa mga tawong nanginahanglan ilabi na sa kabatan-onan.

Sama sa storya ni Philip Jhan Abelo, 19 anyos, nagpuyo sa Buhangin ning dakbayan, ug nagkuha ug kursong BSBA sa Unibersidad sa Mindanao. Iyang kinabuhi dako kaayong inspirasyon kay bisag bata pa siya naa na siya’y dakong kasing-kasing aron motabang.

Isip usa ka estudyante daghan sa iyang ka edad miapil sa mga adunay  ginakawilihang mga butang nga buhaton, apan alang kay Philip ang pag buhat ug kaayuhan para sa isigkatawo ang maong naghatag kaniya ug kadasig nga motabang. Si Philip dunay dakong pagtoo ngadto sa Ginoo. Siya misuway pagka pari apan wala kini gitugot sa panahon.  Apan dili kini ang hinungdan aron dili siya magpadayon sa pag-alagad sa Ginoo.

Iyang pamaagi aron sa pagtabang kay ang pagpakaon sa mga batang iyang makit-an sa kalsada, sa simpleng butang ang pag buhat og sandwich nga gikan mismo sa iyang allowance. Gigahinan gayud niya ug 500 pesos sa iyang allowance aron naa siya’y pamalit og pan ug mayonnaise aron ipang apud-apud sa mga bata nga iyang makit-an sa dalan. “Malouy ko mag tan-aw sa mga bata nga akong maagihan sa kalsada nga wala’y ginikanan,” matud niya.

Nag initiate siya og kampanya sa FaceBook page sa Mission Partners of Mary usa ka grupo nga ang tumong mao ang pagtabang ilabina sa kabatan-onan. Ang grupo adunay Feeding Program, Help a street Child kon asa giawhag ang bata nga mobalik sa ilang mga nagkadaiyang pamilya.

Kini usa sa mga naka awhag kang Philip nga mag padala ug mensahe sa ila aron siya usab maka apil sa grupo, aron kung unsa man ang iyang na sugdan nga pag tabang iya kining mapadayon. Para kang Philip maski unsa pa ka gamay ang butang nga imong buhaton para sa isig ka tao basta kinasing-kasing kini makabaton kag kalipay.

Norlyn G. Morga