MARIA: Inahan sa tuburan sa Kahayag

Tinuod ba nga ang mga Katoliko nagsimba kang Birhen Maria?

Dili, dili kini tinuod. Ang mga Katoliko nagpasidungog (or venerate) sa Mahal nga Inahan; wala sila nagasimba kaniya. Ug kini gipaklaro sa katesismo sa Simbahang Katoliko (ang opisyal nga pagtulon-an sa Simbahan) nga ang pagsimba (or adoration) alang sa Dios lamang. Ang pagsimba gituyo alang lamang sa Dios, apan ang pagpasidungog o pagtahod alang kang Maria ug sa mga Santos, tungod ug pinaagi sa iyang pagtubag, miabot ang Manluluwas nganhi sa kalibutan, angayan siya sa usa ka talagsaon nga matang sa pagtahod nga mas labaw pa kay sa ubang mga santos. Kini nahitabo tungod kay si Maria nakadawat sa maong kahayag – kahayag nga gikan sa Dios nga maoy rason nganong nahimo siya nga inahan sa atong manunubos.

Matud pa sa maong Arsobispo Romulo G. Valles diha sa iyang homiliya niadtong pagsaulog sa ika–75 ka tuig nga kapistahan sa GKK Birhen sa Kasilak sa Tungkalan, Toril sakop sa Virgen De Los Remedios parish, miingon siya nga “angay nato hinumduman nga ang Mahal nga Birhen walay iyang kaugalingon nga kahayag tungod kay dili man siya sama sa Dios.” Kining mga pulong sa maong Arsobispo nagtudlo kanato nga ang dungog ug pagpasidungog nga gihatag kang Maria mas napalalom pa ang atong pagsimba sa Dios. Kining kamatuoran mahitungoda kang Birhen Maria isip inahan sa atong manunubos naghatag kaniya sa usa ka titulo isip labing balaan nga inahan sa kahayag (Mary Most Holy Mother of Light).

Makapangutana kita nganong Birhen sa kasilak man o Birhen sa kahayag nga wala man kahay kaugalingon nga kahayag si Maria? Tinood nga ang Mahal na Birhen walay iyang kaugalingon nga kahayag, apan ang rason nganong gitawag siya ug Birhen sa kahayag tungod kay si Maria naigo sa kahayag sa Dios. Ang kahayag sa Mahal na Birhen gikan sa kahayag sa Dios. Dugang pa niini, ingon si Arsobispo Valles nga diha sa kasaysayan sa atong pagtoo, gidawat ni Maria ang gasa sa kahayag diha sa iyang pagpanamkon sa tag-iya sa kahayag. Kini nagpasabot lamang nga tungod sa mismong “Oo” (or Fiat) ni Maria mipahiduol siya sa mismong kahayag ug midawat sa tag-iya sa kahayag. Dili siya ang kahayag apan mipahiduol siya sa tuburan sa kahayag – walay lain kondili si Kristo.

Mao nga tinood nga ang mga Katoliko wala magsimba sa Mahal na Birhen Maria. Nangayo lamang sila ug pangaliya ug pag-ampo kang Maria aron sama kaniya masinati usab nila ang samang kahayag nga iyang nadawat. Nga sama ni Maria ang ilang mga kasing-kasing makakita ug makasinati sa kahayag sa gahom sa Dios. Ingon pa sa maong panultihon: “Ngadto kang Jesus pinaagi ni Maria” (To Jesus through Mary). (Sem. John Lloyd S. Ramos)