Gipiyalan Aron Kinaiyahan Maampingan

Diha sa mensahe sa atong Santo Papa alang sa World Day of Prayer for the Care of Creation, siya miingon, Ang moral nga pakigbisog sa mga Kristiyano nalambigit sa “pag-agulo” sa kabuhatan, kay sukad pa ang ulahi “napailawom na sa pagkakawang” (Rom. 8:20). Ang tibuok uniberso ug ang matag nilalang niini nag-agulo ug nangandoy nga “walay pailob” nga mabuntog ang presenteng kahimtang niini ug mapasig-uli ang orihinal nga kahimtang. Busa ang atong kalingkawasan naglakip sa tanang binuhat kinsa, sa pagpakighiusa sa tawhanong kahimtang, gibutang ilalom sa yugo sa pagkaulipon. Ang binuhat mismo, sama sa katawhan, naulipon, bisag dili sa iyang kaugalingon nga sayop, ug nakakaplag sa iyang kaugalingon nga dili makatuman sa malungtarong kahulogan ug katuyoan diin kini gidisenyo. Kini gipailawom sa pagkabungkag ug kamatayon, nga gipasamot sa pag-abuso sa tawo sa kinaiyahan. Sa samang higayon, ang kaluwasan sa katawhan diha kang Kristo maoy seguradong paglaom usab alang sa kabuhatan, kay, “ang kabuhatan mismo pagaluwason man gikan sa pagkaulipon niini ngadto sa pagkadunot ug makabaton sa mahimayaong kagawasan sa mga anak sa Diyos” (Rom 8:21).

Subay niini, isip mga piniyalan sa kabuhatan, niadtong Septembre 1, 2024 pormal nga giablihan ang pagsaulog sa tinuig nga Season of Creation ubos sa temang Hope and Act with Creation pinaagi sa Santos nga Misa nga gipanguluhan ni Most Rev. Romulo G. Valles, D.D., didto sa San Pedro Cathedral Parish ning siyudad. Diha sa homiliya, ang atong arsobispo nanghinaut nga niining pagsaulog sa World Day of Prayer for the Care of Creation ang tanan mahatagan ug kadasig aron sa pag-atiman sa kinaiyahan.

Human sa Santos nga Misa, gihimo sa mga pundok sa mga bikers ang usa ka symbolic tree planting diin adunay setentay singko ka mga seedlings ang gipananom didto sa Indangan, ubos sa Parokya sa Our Lady of Miraculous Medal. Agi’g parte usab sa ika setentay singko nga anibersayo sa Arkidiyosis sa Dabaw adunay mga kalihukan nga ipahigayon sa tibook bulan sa Septembre alang sa pag-atiman sa kinaiyahan sama sa pagpangolekta ug mga single-used plastics nga ipahigayon sa matag parokya sa Arkidiyosis, community and coastal clean-up, mangrove tree planting ug uban pa.