Maria: Inahan sa mga Anak sa Kanunay’ng Pangayo

“Ma, ngayo ko” “Ma, gi-away ko ni” “Ma, uban ko”

Kini nga mga pulong nag hulagway sa atong mga yano nga gi-gikanan isip tawo. Luyo sa kung kinsa kita karon, mao ang kamatuoran nga adunay panahon sa atong mga linghod nga katuigan kung diin nahimo kitang mga “batang sipon-on” atubangan sa usa ka tawo nga diha sa atong mga kahuyang, masaligon kitang midangop ug gani gadangop hangtod pa man karon, uban sa pagtoo nga diha kaniya, mamahimong hapsay ang tanan; ug mao kana ang atong mga inahan.

Maong dili na usab lisud sabton ang mga pulong ni Most Rev. Guillermo Afable, D.D. (Obispo sa Digos) sa dihang nagpa-ambit siya mahitungod sa atong relasyon kang Birhen Maria kaniadtong Septembre 3, 2024 sa Diocesan Shrine of Our Mother of Perpetual Help sa Maco, Davao de Oro sa ika-4 nga adlaw sa gipahitabo nga Marian Pilgrimage sulod sa Dyosis sa Tagum, sa dihang mi-ingon siya nga ang atong paghigugma kang Birheng Maria, kanunay nag-gamot sa atong pag-ila kaniya isip inahan sa atong manunubos ug inahan sa tibuok katawhan. Pagka-inahan nga dili lang kutob sa mga pulong ni Jesus sa krus kundili pagka-inahan nga nabati usab nato sa matag higayon diin kita midangop sa iyang pangaliya ug pag-ampo.

Sa gikaingon pa sa maong magbalantay, nga ang maong paghigugma, dili masabtan pinaagi sa gahum sa pang huna-huna apan masabtan lamang pinaagi sa atong dakong gugma sa mahal nga Birhen nga ginahulagway sa atong walay puas nga pagdebosyon kaniya ug uban kaniya. Maong luyo sa nagkadaiya nga imahe sa atong mahal nga inahan, ang paghigugma nato kang Maria nagpabilin nga madasigon sukad pa kaniadto. Usa ka nagdilaab nga gugma nga nag paila kanato isip katawhan nga mahigugmaon kang Maria o Pueblo Amante de Maria.

Apan dili usab ikalimod nga ang maong mga buhat sa debosyon, tuod sakto ug maayo nga buhat, mamahimo lamang nga kompleto kung kini tinuod nga magtoltol kanato padulong sa kabubut-on sa Dios. Nga ang mga pagdebosyon ug mga pag-ampo, mamahimo lamang matawag nga tinuod nga mabungahon kung ang atong mga buhat pagsakripisyo, ang atong walay undang nga pagluhod ginamit ang atong mga binhod nga tuhod, ug ang walay puas nga pag-rosaryo ginamit ang atong mga nagkurog nga mga kamot, atong ikahalad dili na lamang alang sa atong mga kaugalingon ug alang sa atong mga katagbawan kundili alang na sa uban ug labaw sa tanan, alang na sa tibuok kalibutan.

Kini nagatoltol kanato sa tinuod nga misyon luyo sa atong mga debosyon mao nga; susama nga kita gi-gasahan hilabina pinaagi sa pangaliya sa Mahal nga Birhen, mamahimo unta usab kita nga mga buhing gasa alang sa uban. Nga ang langitnong ayuda nga atong nadawat ug gi-tagamtam mag kat-on unta usab kanato nga mamahimong dagway sa grasya ngadto sa mga nag-lisud og nanginahanglan. Hinaot nga diha sa atong masaligong pagdangop sa mga bukton sa atong maluluy-on nga inahan, ipa-ila unta usab nato siya ngadto sa uban aron sila usab makabati sa gugma ni Maria ug sila usab sama kanato, mamahimong mu-higugma kaniya. Labaw sa tanan, kining maong pagdebosyon nato sa Mahal nga Birhen, mag tudlo unta kanato nga mamahimonog susama niya nga matoohon, matinumanon, ug mapaubsanon hilabina atubangan sa atong Ginoo nga maoy sinugdanan ug katapusan sa tanan natong mga pag-ampo ug debosyon.

Nganong dali man kaayo kita mudangop sa Inahan sa Kanunay’ng Panabang? Simple lang gayud ang rason. Kini tungod kita mga anak usab sa kanunay’ng pangayo. Usa ka pag-paila ug pag-angkon nga tuod adunay kita’y nagkadaiya nga mga pagsulay ug aduna usab kita’y nagkadaiya nga mga gasa, kitang tanan nahiusa isip usa ka katawhan nga nahigugma ug nagasalig sa usa ra pud ka Inahan. Usa ka pagpahinumdom nga luyo sa kalayo na sa atong nakab-ot ug gani makab-ot puhon, anaa kanunay ang atong inahan nga maga-ampo alang sa atong kaayohan. Nga sama nga aduna kitay dakong pagsalig nga mapapas ang tanang sakit sa kalawasan sa simple nga tayhop lamang sa atong mga inahan, masaligon usab kita nga makapadayon kita ug baktas sa kinabuhi, luyo sa mga pagsulay kauban si Jesus ug uban si Maria nga atong dalangpanan. Inahan sa Kanunay’ng Panabang, ig-ampo mo kami. (Sem. Harvy Enargan)