ANG PAGTAWAG UG AMAHAN O FATHER SA MGA KAPARIAN UG ANG PAGPANGUMPISAL SA PARI?

Maayong Adlaw kaninyo Brothers, mangutana lang unta ko ngano man nga kitang Katoliko motawag man ug Father sa mga Kaparian ug ngano man pod nga kon makasala ta sa ila man ta mangumpisal? Dili ba supak kini diha sa Bibliya? Ako si Arman taga Davao city lang Salamat ug God Bless sa inyo.

Tubag : Dili daotan ang pagtawag ug Amahan sa mga kaparian, sanglit ang kasulatan mismo ang nagtudlo niini. Diha sa Mateo 23:9 diin si Kristo miingon ayaw kamo ug pagtawag ug Amahan ni bisan kinsa dinhi sa yuta kay usa lang ang inyong amahan nga atua sa langit, dili kini reperado sa mga kaparian kay buot ipasabot ni Ginoong Jesukristo diri nga kong moila ka sa usa ka tawo ug gitawag nimo ug Amahan sama sa Dios gidili gayud kini, kay gitumbok ni Kristo sa pag-ingon niya nga ayaw kamo pagtawag ug amahan ni bisan kinsa mao kadtong mga Parisiyo diin iyang gibadlong ug gisaway ang sinayop nga pagsabot (Mat. 23:9-12), Ug ang pagtawag nato ug Amahan sa mga kaparian wala kini gidili gani gitugot pa kini kay ang atong mga kaparian sila man ang atong Amahan sa espirituhanon nga pagtulun-an. Sama sa giingon ni San Pablo nahimo siyang Amahan tungod sa pagsangyaw sa maayong Balita (1 Cor. 4:15), ug sa 1 Juan 2:13 ang mga magtotoo gitawag ug Amahan kay usa ra kita sa espirtuhanon nga pagtulun-an. Kung absoloto pa nga gidili gayud ang pagtawag ug Amahan ni bisan kinsa nan nasayop diay ang Dios sa paghatag niya sa kasugoan nga tahuron mo ang imong Amahan ug Inahan (Exodo 20:12), agig pagrespeto sa atong mga ginikanan ang atong Amahan tawagon nato ug PAPA nga sa English pa Father, busa dili daotan nga motawag kita ug amahan dinhi sa yuta agi ug pagrespeto nganha kanila, kay bisan pa sa daang tugon ang mga balaang tawo gitawag ug Amahan sama kang Elias gitawag ni Eliseo ug Amahan (2 Hari 13:14), si Jose gihimong Amahan ni Paraon (Gen. 45:8), ug sa Bag-ong tugon si Esteban mitawag ug Amahan kang Abraham (Buhat 7:2-4,16-17), mga tawhanong Amahan gitahud (Heb. 12:9-10), ug ang Dios wala gayud mibadlong niini gawas kung imong pagtawag ug amahan isusama nimo sa Dios, mao nga kitang mga Katoliko nagtawag ug Amahan sa mga kaparian dili ingon nga Dios kondili sama sa giingon ni San Pablo mga espiritohanong Amahan.  Ang Pagkumpisal usa kini ka sakramento nga diin kita ug ang atong kasal-anan atong i-hinolsol ug ipangayo ug pasaylo ngadto sa Dios (1 Juan 1:9), busa ang Dios naga-sugo kanato nga atong hinolsolan ug ikumpisal ang atong mga kasal-anan (Pan. 28:13). Ang pagkumpisal sa Pari usa kini ka mando sa Dios nga diin kung kita makasala adto kita sa Pari sa Dios mangumpisal (Ecclesiastes 5:6), tinuod nga ang Dios lamang ang makapasaylo sa sala (Marcos 2:7), apan DILI KITA MAKABOOT SA DIOS KUNG IYANG IPIYAL ANG GAHUM UG AWTORIDAD SA PAGPASAYLO SA SALA NGADTO SA IYANG MGA KAPARIAN,” Gihuypan sila ni Jesus ug giingnan dawata inyo ang Espiritu Santo, bisan KINSA NGA SALA ANG INYONG PASAYLOON, GIPASAYLO KINI, ug ang dili ninyo pasayloon dili ko usab pasayloon” (Juan 20:21-23), busa klaro kayo nga ang Dios mismo maoy nagpiyal ug nagtugot sa iyang mga tinun-an sa pagpasaylo sa mga sala sa katawhan ug napasa kini sa ilang mga sumusunod nga mao ang kaparian, ug kining pagkumpisal sa atong sala ngadto sa mga tawo sa Dios daan ng gibuhat sa Daang Tugon: Diha sa 2 Samuel 12:13 si David miagi sa tinugyanan sa Dios nga mao si Natan aron sa pagpangayo ug pasaylo sa iyang mga sala. Job 42:8 tulo ka higala ni Job ngadto nagsugid kaniya sa ilang mga sala ug si Job maoy nag-ampo kanila ngadto sa Dios aron mapasaylo ang ilang mga sala. Busa dayag sa kasulatan diin mismo ang Dios maoy nagsugo nga kung makasala kita moadto kita sa iyang mga alagad nga mao ang mga kaparian (Mal.2:7), kay bisan ang Pari tawo ug makasasala, apan wala sa ilang pagka-tawo ang gahum sa pagpasaylo kondili sa gahum nga ilang nadawat sa pagka-pari mao nga sila makapasaylo sa mga sala sa tawo, sama nga ang silhig hugaw apan wala magpasabot nga dili na kini makakuha ug hugaw. Sama usab niana ang Pari bisan tawo makasasala usab, apan tungod sa iyang awtoridad nga gihatag sa Dios kanila mao nga makapasaylo sila sa mga sala sa Katawhan sa Dios.