Ang Pagpaminaw alang sa Hiniusang Panaw (ACLAIM Synodal Assembly)

Ang Archdiocesan Council of the Lay Apostolate and Integrated Movements (ACLAIM) nagpahigayon sa ilang synodal assembly niadtong Agosto 10, 2024 sa Sedes Hall, Holy Cross of Davao College. Gisugdan ang maong asembleya sa usa ka Santos nga Misa nga gipanguliuhan ni Rev. Fr. Marbendear Morallas ang Episcopal Vicar for the Laity sa arkidiyosis sa Dabaw. Gilangkoban sa maong kalihokan ang usa ka pagpaambit nga gihatag ni Rev. Fr. Jose Junar dela Victoria ug ang pagpaminaw sa mga mahinugdanong pulong ni Most. Rev. Romulo G. Valles, D.D.

Sa pagkahapon, gipahigayon ang ang conversation in the spirit diin ang mga partisipante nagpahayag sa ilang kalipay diha sa ilang pag-alagad sa Dios dinasig sa ilang pagtoo, gugma, ug ang lig-on nga pagbati sa komunidad nga naghiusa kanila. Dugang pa, isip bunga sa ilang pagpaambit, ang ilang pag-alagad gihulagway pinaagi sa pagsalig sa grasya sa Dios, sa mapadayonon nga pagtubo espiritwal, ug sa pagpasalig sa paggamit sa ilang mga gasa alang sa mas dakong kaayohan. Ang pagtambayayong ug ang pagkaabli diha sa giya sa Simbahan nakita nga mahinungdanon kaayo alang sa ilang misyon, samtang sila naningkamot sa pagpaduol sa katawhan ngadto kang Kristo.

Diha sa atong paglawig dili malikayan nga anaay daghang mga hagit. Gani ang mga partisipante nag-atubang usab sa personal ug komunal nga mga pagpakigbisog, lakip na ang kalisud sa pagbalanse sa pagkinabuhi ug ang mga pagbati sa kakulang. Sumala pa, ang miscommunication, biases, ug ang internal nga politika nagmugna og mga babag alang sa epektibong kolaborasyon, samtang ang pagbati sa panag-indigay ug pagka-ekslusibo sa mga komunidad nakababag sa panaghiusa. Ang panginahanglan alang sa mas dakong partisipasyon sa mga kalihokan sa GKK ug ang panginahanglan sa pagdasig sa mga batan-ong miyembro naghighlight sa mga dapit diin gikinahanglan ang dugang nga pagpaningkamot.

Kini nga mga kamatuoran nagpasiugda sa panginahanglan alang sa padayon nga pagpakigdayalogo, pagtinabangay, ug pagsuporta sa usag usa aron makab-ot ang usa ka nagkahiusang simbahan diha sa hiniusang panaw padulong kang Kristo. Ang mga kasinatian ug panabut sa mga lideres nagpadayag sa potensyal ug sa mga babag diha sa pagkab-ot sa tiunay nga sinodal sulod sa Simbahan ug sa mga layko nga komunidad sa Davao. (Sem Resty Cabahug)