Bisita Pastoral: Dugang Kadasig Sa Pagtoo Sa Mga Parokyano Sa Lumondao

Mainiton ug masadyaon ang pagsugat sa mga Parokyano sa Lumondao sa atong halangdong Arsobispo sa Dabaw nga si Most Rev. Romulo G. Valles, D.D. alang sa iyang duha ka adlaw nga Bisita Pastoral sa San Isidro Labrador Parish – Lumondao niadtong Agosto 3-4, 2024.

Isa sa mahinungdanong kalihukan sa Bisita Pastoral mao ang Servant Leader-Shepherd Encounter diin nakighimamat ang atong Arsobispo sa kapin 800 nga mga GKK Servant Leaders sa Lumondao. Adunay mga pagpaambit gikan sa mga pangulo ug aduna poy mga pangutana o pagpaklaro diha sa atong Amahan sa Arkidiyosis. Si Yanong Muloy, mipaklaro sa mga lideres sa Lumondao nga ang atong simbahan walay pagpili, ang tanang binunyagan sa katilingban miyembro sila sa Simbahan. Busa, usa ka hagit sa mga lideres ang pag-bisita sa mga nahuyang na sa ilang pagtoo aron makabig sila pag-usab na musimba ug mas mapalawon pa nila ang ilang pagtoo diha sa Ginoo. Dugang pa niini, adunay mga pasundayag nga giandam sa mga GSL ug ang paghatag sa regalo sa muabotay nga Episcopal Anniversary ni Archbishop Valles, usa ka portrait diin gigama sa usa ka batan-on sa Lumondao gamit lang sa uling.

Misunod niini ang Rite of Reception ug Santos nga Eukaristiya nga gipangulohan sa atong Arsobispo sa Dabaw uban sa Kura-Paroko sa Lumondao nga si Rev. Fr. Dexter C. Veloso. Sa iyang homiliya. Matud pa ni Archbishop kita ang tinuod nga simbahan. Kita ang “One, Holy, Catholic, and Apostolic Church,” mao ang marka o simbolo sa mga Kristiyano nga naghulagway sa tinuod nga Simbahan nga gitukod ni Jesus Cristo. Kini nga marka gigamit sa Nicene Creed, usa ka tradisyonal nga pamahayag sa pagtoo sa mga Katoliko. Si Jesus kauban ang mga disipulo adunay eukaristiya, nga nailhan usab nga santos nga Misa o Sakramento sa Eukaristiya, usa ka sentro nga ritwal.

Sa hapon nga bahin, ang arsobispo nakig-himamat sa tanang mga kabatan-onan ug gipakita ang dayag ug importansya unsa kadako nga tabang isip usa ka batan-on ang youth ministry nga nakapadugang ug kusog alang sa dalan nga ilang gisubay. Ang mga kabatan-onan sa Parokya mi hatag ug presentasyon ug nagpakita ug timaan isip mga talentadong mga kabatan-onan sa Parokya ug adunay positibo nga panglantaw sa tanang kabataan.

Lakip sa mga kalihukan atol sa Bisita Pastoral, mao ang pagbisita sa pinaka karaang kapilya nga sakop sa Parokya, ang GKK San Pedro, Yuhico, ug nagpahigayon ug Santos nga Misa. Sumala pa sa mga pangulo sa maong kapilya ug Sona, usa kato nga mahinungdanong kalihukan ug nakapadasig sa ilang pagka Katoliko. Ang pagka-mapaubsanon sa Ginoo, nasinati sa dihang nakig-uban ang atong Arsobispo sa mga layko bisan paman sa (kakapoy sa tibuok adlaw na mga kalihokan) ang tam-is nga pahiyom ug abli kanunay nga pakighinabi sa Arsobispo sa katawhan nagpatigbabaw gayud.

Sa ikaduhang adlaw sa iyang pagbisita, nakiguban si Yanong Muloy sa tanang PPC ug Parish Staff ug salo-salo sa paniudto uban ang kalipay ug pagmaya. Misunod dayon ang pagpahigayon sa Sacramento sa Kumpirma ug adunay 223 ka mga gikompirmahan. Ang atong mga kaigsoonan nga midawat sa maong kompirmasyon ilang gibati og sa dakong kalipay, pasalamat, ug kalig-on sa espirituwal nga kinabuhi.

Tinuod gayud nga ang pagbisita sa arsobispo nagdala ug dakong kadasig ug inspirasyon sa tanang parokyano sa San Isidro Labrador Parish – Lumondao. (SILP – Lumondao Parish SocCom Ministry)