National Catholic Social Communications Convention 2024 Malampuson nga Gisaulog

Niadtong Agosto 8, 2024, gitapos ang upat ka adlaw nga panagtigom sa mga Catholic Communicators alang sa National Catholic Social Communications Convention 2024 ubos sa temang “AI: Authentic Influencers for an Empowered Church”, didto sa Aquamarine Recreational Center, Lipa City, Batangas.

Ang maong kalihokan gitambongan sa mga nagkadaiyang representante gikan sa nagkalain-laing Arkidiyosesis ug Diyosesis sa nasud. Ang upat ka adlaw nga kalihokan napuno sa mga makahuluganon nga mga sesyon ug sa diwa sa panaghinigalaay.

Diha sa pagpakighinabi kay Most Rev. Marcelino Antonio M. Maralit, Jr, D.D., ang bishop sa Boac ug Chairman sa CBCP Episcopal Commission on Social Communications (ECSC), iyang gipaambit ang iyang kahinam gikan sa pagsugod sa convetion hangtud sa pagkahuman niini. Kini tungod sa mga posibilidad nga iyang nakita nga mahitabo pagkahuman sa maong convention ilabi na nga iyang gitan-aw kon diin ang simbahan paingon isip ministriya dili lamang sa usa ka diyoses kondili sa kinatibuk-an.

Subay niini aduna usab giplano nga pagtukod ug digital space alang sa mga social communicators. Dugang pa sa ni Bishop Maralit, kini usa ka gasa gikan sa EWTN diin mihatag sila ug usa ka platform sa teknolohiya aron nga magtabang sa ministriya sa social communication aron nga makagama kita ug social headquarter. Usa ka buhatan diin ang matag diyosesis adunay tagsa-tagsa ka mga opisina nga mamahimong dalan diin ang pagkoordinar, pagpakigkomunikar ug ang pagtinabangay sa usa’g usa magdala ngadto sa usa ka labing maayong gawi. Lakip sa plano sa maong buhatan ang pagbutang ug usa ka librarya sa mga materyales nga mamahimong magamit sa tanan alang sa ministriya ug ang space for dialogue.

Sa katapusan, isip tambag ug hagit ni Bp. Maralit alang sa atong ministriya sa social communication dinhi sa arkidiyosis sa Dabaw, ingon niya nga pinaagi diha sa pagpaminaw sa mga pagpaambit, kinahanglan maanaa kanunay ang katin-aw sa atong misyon ug tumong, pagkaabli alang sa pagbag-o, ug ang pagkamaayong tigpaminaw tungod kay ang pinakamaayong paagi sa paghatag sa mensahe mao ang pagpaminaw. Dugang pa niya nga mao kini ang usa sa gihisgotan ni Fr. Fiel Pareja ug rason nganong kinahanglan kitang mohunong. To pause – alang sa pag-ampo ug pagpangita sa atong relasyon diha kang Kristo. Gani, diha sa panapos nga misa nga gipangulohan ni Bp. Maralit, miinigon siya sa iyang homilya nga “Ang Dios mao ang maghatag kanato sa mga pag-aghat, sa inspirasyon aron kita makaila Kaniya. Ug kon kita makaila na Kaniya, atong makita kon asa kita ug kon unsa ang angay natong buhaton—ang atong misyon ug tawag sa pagkabalaan.” Kini nga mga pulong gikan sa obispo naglangkob sa esensya sa tema sa convention, nga nag-awhag sa tanang nanambong sa pagdala sa diwa niini ngadto sa ilang adlaw-adlaw nga kinabuhi, hilabi na nga mga hagit diha sa responsableng paggamit sa teknolohiya mamahimo unta silang mga tiunay nga mga influencer alang sa usa ka gipalig-on nga Simbahan. (Sem Resty Cabahug)